Jarylys jumystary 25 qarashaǵa deıin aıaqtalady dep josparlanyp otyr
Ótken jyldyń tamyz aıynda jarylys bolǵan Jambyl oblysynyń Baızaq aýdanyndaǵy áskerı bólimniń aýmaǵynan oq-dárilerdi joıý jumystary qaıta jandandy, dep habarlaıdy Almaty-akshamy.kz "Habar 24" telearnasyna silteme jasap.
Telearna málimetinshe, mamandar Qaınar aýylynan 12 shaqyrym jerdegi elsiz taýly aımaqta jarylys jasap jatyr. Dúısenbiden jumaǵa deıin saperlar 720 mınany joıady. Jarylys jumystary 25 qarashaǵa deıin aıaqtalady dep josparlanyp otyr.
Osyǵan deıin 500 kelige jýyq oq-dári joıylǵan. Jarylys bolatyn jerdi oblys ákimdigi bergen. Mamandar apta saıyn jergilikti turǵyndarǵa túsindirý jumystaryn júrgizip, jarylystardan qoryqpaýǵa jáne túsinistikpen qaraýǵa shaqyrady.
Jarylys jumystary kezinde barlyq qajetti qaýipsizdik sharalary saqtalady.
Eske salaıyq, 2021 jyl 26 tamyzda Jambyl oblysy Baızaq aýdanynda ornalasqan áskerı bólimde saǵat 19.00 shamasynda qoımalardyń biriniń mańynan órt shyqty. Órt saldarynan anyqtalmaǵan zattar jaryldy.
Memleket basshysy Qasym-Jomart Toqaev 29 tamyzdy Jalpyulttyq aza tutý kúni dep jarıalaǵan bolatyn. Keıin Prezıdent qaza tapqandardy marapattady.