Reseı İİM baspasóz qyzmetiniń rastaýynsha, Máskeýde polısıa qyzmetkerleri 5000 rúbldik jalǵan kýpúralardy taratty degen kúdikpen Qazaqstan azamatyn ustady, dep habarlaıdy aqshamnews.kz
Vedomstvo málimetinshe, 23 jastaǵy jigit messendjer arqyly 5000 rúbldik 300 jalǵan banknot satyp alyp, olardy Reseıdiń túrli aımaǵynda ótkize bastaǵan. Ol arzan taýarlardy satyp alý arqyly jalǵan aqshamen eseptesip, qaıtarymǵa shynaıy aqsha alyp otyrǵan.
Tergeý barysynda onyń 28 kýpúrany ótkizip úlgergeni anyqtaldy: ekeýin — Volgograd oblysynda, on birin — Astrahan oblysynda, taǵy on besin — Máskeýde.
Kúdikti astanaǵa Volgogradtan kelgen polısıa qyzmetkerleriniń issapary kezinde ustaldy. Jeke tintý kezinde odan jalpy somasy 1,36 mıllıon rúbl bolatyn 272 jalǵan kýpúra tárkilendi.
Atalǵan fakt boıynsha Reseı Federasıasy Qylmystyq kodeksiniń 186-baby 1-bóligi ("Jalǵan aqshany jasaý, saqtaý, tasymaldaý nemese ótkizý") boıynsha qylmystyq is qozǵaldy. Kúdikti qamaýǵa alyndy.
Qazir jalǵan kýpúralardyń shyqqan kózin anyqtaýǵa baǵyttalǵan tergeý amaldary júrgizilip jatyr.