Búgin — ulttyq rýhymyzdy asqaqtatyp, kıeli ónerimizdi ulyqtaıtyn Ulttyq dombyra kúni!
Dombyra – halqymyzdyń jany, barlyq bitim-bolmysy, ǵasyrlar boıy elmen birge jasasyp kele jatqan kıeli murasy.
Onyń kúmbirlegen qońyr úni – el birliginiń, rýhanı sabaqtastyqtyń nyshany. Búgingi urpaqtyń ata-baba murasyn baǵalap, dombyra únin áýelete kóterip kele jatqany — qýanarlyq jaıt.
Ulttyq dombyra kúni qurmetine Almaty qalasynyń Mýltımedıalyq dástúrli mýzyka ortalyǵynda Alataý, Naýryzbaı jáne Áýezov aýdandarynan jınalǵan 125 oqýshy “Balbyraýyn”, “Adaı” kúılerin bir mezette oryndady.
Ónerdi súıetin jetkinshekterge belgili óner juldyzdary — dáýlesker kúıshi, QR Mádenıet qaıratkeri Murat Ábýǵazy men Mádenıet salasynyń úzdigi, kúıshi Nurlan Túmenbaı jetekshilik etti.
Al dástúrli ánshi, QR eńbek sińirgen qaıratkeri Sáýle Janpeıisova óziniń “Amanat” mektebinde dáris alyp júrgen 16 shákirtimen “Dombyra” ánin birge áýeletti. Ustaz ónerdi baǵalaı biletin órenderdiń bolashaǵyna sáttilik tiledi.