Sońǵy kezderi jalǵan aqparat taratý toqtamaı tur. Ásirese, adamdarǵa ekpe arqyly chıp salý, ekpeden soń túrli aýrýlarǵa shaldyǵady ekensiń degen aqparattar áleýmettik jelilerde jeldeı esip júr. Kez kelgen aqparatty nemese otbasylyq chatqa kelgen kúdikti málimetti stopfake.kz resmı saıtynda tekserýge bolady dep habarlaıdy almaty-akshamy.kz
Aleksandr Danılov, Stopfake.kz jobasynyń jetekshisi:
– Jalǵan málimetterdi ǵylymı túrde zerttep, halyqaralyq uıymdar men quzyrly mekemelerdiń kómegimen zertteý júrgizemiz. Biz qate jańalyqty nemese jalǵan bolyp kórinetin habarlamalardy taýyp, tekseremiz. Áleýmettik jelilerge monıtorıń jasaımyz. Kóp jaǵdaıda feık jańalyqtyń derekkózi bolmaıdy. Kúnine 10 shaqty feık aqparatty tekseremiz.
Shuǵyla Turlybek, QR İshki ister mınıstrliginiń ókili:
– Jalǵan aqparat taratqandarǵa 1000 aılyq eseptik kórsetkishke deıingi mólsherde aıyppul salynady. Ne bolmasa túzeý jumystaryna, ne 400 saǵatqa deıingi merzimge qoǵamdyq jumystarǵa tartylady. Sondaı-aq bir jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrý jazasy qoldanylady.
Jalpy, jyl basynan beri el boıynsha feık aqparat taratqandarǵa qatysty 43 qylmystyq is qozǵalǵan. Onyń bireýi sotqa joldandy. Al byltyr dál osy kezeńde, ıaǵnı indet órship turǵan kezde 63 jalǵan málimet anyqtalǵan.
Bıyl halyqty vaksınalaý jóninde jalǵan aqparat taratqandarǵa qatysty 11 qylmystyq is qozǵalǵan. Qazir onyń úsheýi boıynsha tergeý júrip jatyr.