Almaty ákimi Erbolat Dosaev QHR-na jumys sapary aıasynda Beıjiń meri In Iýnmen kezdesti. Kelissóz barysynda taraptar qalalar arasyndaǵy ekijaqty seriktestikti nyǵaıtý múmkindigin talqylady. Ásirese, kólik ınfraqurylymyn damytý, ekologıalyq ahýaldy jaqsartý jáne jaıly qalalyq orta qalyptastyrý máselesine basa nazar aýdaryldy, dep habarlaıdy aqshamnews.kz
Kelissózdegi basty túıtkildiń biri qalalardyń ekologıalyq jaǵdaıy edi. In Iýnnyń aıtýynsha, sońǵy 20 jylda Beıjiń atmosferaǵa zıandy shyǵaryndylar deńgeıin aıtarlyqtaı tómendetýge qol jetkizgen. Bul júıeli ekologıalyq saıasattyń, ǵylymı tásildiń jáne tehnologıalyq ınovasıanyń jemisi. Lastaný deńgeıin tómendetý 2016 jyly qabyldanǵan Beıjińniń Bas jospary negizinde qolǵa alynǵan. Bul jospar aıasynda metro júıesin keńeıtý, ekologıalyq taza kólik túrlerine baǵyttalǵan yńǵaıly kólik júıesin damytý jáne tómen shyǵaryndylar aımaqtaryn (LEZ) qurý kózdelgen, bul ekologıalyq talaptarǵa saı kelmeıtin kólik quraldarynyń qozǵalysyn shekteıdi.
Beıjiń merimen áńgime barysynda Erbolat Dosaev qazirgi ýaqytta Almatyda da atmosferalyq aýany qorǵaý, núkteli qurylysqa jol bermeý, qalanyń kólik qańqasyn qalyptastyrý jáne jyldam relsti ári qoǵamdyq kólikti damytý boıynsha sharalar qabyldanyp jatqanyn jetkizdi. Almaty ákimi 2023 jyldyń mamyr aıynda Almatynyń jańa Bas jospary qabyldanǵanyn, onyń sońǵy 20 jyldan astam ýaqyt boıy qaıta qaralmaǵanyn habarlady. Bul jospardyń negizinde tarıhı ortalyqqa júktemeni azaıtýǵa baǵyttalǵan polıortalyqty damý qaǵıdaty jatyr. Mundaı sharalar qalalyq ortany teńgerimdi damytýǵa múmkindik beredi.
Kezdesý qorytyndysy boıynsha taraptar ekijaqty qarym-qatynasty nyǵaıtýǵa ýaǵdalasyp, Almaty men Beıjiń arasyndaǵy seriktestiktiń damýy Qazaqstan men Qytaıdyń eki qalasynyń ekonomıkalyq ósýi men turaqty damýyna yqpal etetinine senim bildirdi.