El ishi, onyń ishinde Almaty da qalypty tirshiligine oralýda. Degenmen, «Saqtansań, saqtaımyn» demekshi, áli de arqany keńge salatyn ýaqyt emes. Quqyq qorǵaý organdary mindetterin burynǵydan da kúsheıtip, sapta kirpik qaqpaı el tynyshtyǵyn kúzetip saq tur.
Keshegi el basyna qara bult tóngen sátte Qazaqstan Respýblıkasy Ulttyq ulany «Ońtústik» óńirlik qolbasshylyǵyna qarasty áskerı bólimderdiń ofıserleri men sarbazdary da aldyńǵy shepte júrdi. Ókinishke qaraı, jaraqattanǵandar da bar. Olardyń arasynda Almatydaǵy 7552 áskerı bóliminiń sarbazy qostanaılyq Jádiger Ábdirahmanov ta bar. Qazir ol áskerı bólimdegi lazarette em qabyldap jatyr.
– Bizdi 4 qańtarǵa qaraǵan túni saǵat 1-ler shamasynda shuǵyl dabylmen Almaty kóshelerinde oryn alǵan jappaı tártipsizdikti retke keltirý maqsatyndaǵy jaýyngerlik qyzmetti oryndaýǵa jınady. Júktelgen áskerı mindetimizdi oryndap, keri qaıtyp kele jatqanymyzda, biz otyrǵan «KamAZ» kóligine shabýyl jasaldy. Kólikke syrttan tas, bótelkeler jaýdyra bastady. Bir kezde kýzovqa tútindetkish granata laqtyrdy. Bárimiz kólikten jedel túsýge yńǵaılana bastaǵanymyzda, bir top adam lap qoıdy da, bas-kóz demeı tópelep ura bastady. Basymnan qatty soqqy alǵan men esimdi joǵaltyppyn. Esimdi jısam, áldebir qonaqúıde jatyr ekenmin. Meni sol mańda ornalasqan qonaqúıge beıbit turǵyndardyń kirgizip alyp, alǵashqy medısınalyq kómek kórsetkenderin bildim.
Men Ulttyq ulannyń sapynda júrgenimdi, el basyna osyndaı qıyndyq túsken sátte komandırlerimniń tapsyrmasyna jáne halqyma adal bolǵanymdy maqtan etemin. Shyny kerek, beıbit ómirdiń qadirin osyndaı syn saǵatta sezinedi ekensiń. Jáne de júregińniń myqtylyǵy da, patrıottyq sezimiń de osyndaı kezde tarazyǵa túsedi. Bizdiń jigitterdiń bári myqtylyǵyn kórsetti. Degenmen, endi mundaı jaǵdaı qaıtalanbasyn dep tileımiz, – deıdi qatardaǵy jaýynger Jádiger Ábdirahmanov.
Eske sala keteıik, qazir megapolıstegi jaǵdaı turaqty. Qalada saǵat túngi 23.00-den tańǵy 07.00-ge deıin komendanttyq rejım engizilgen.