Álemniń kóptegen elderiniń halqy ózderin koronavırýstyń jańa shtamynan oqshaýlasa, al Almaty turǵyndary, ásirese, jastar karantın sharalaryn kún saıyn buzyp keledi. Megapolıstiń bas sanıtarlyq dárigeri Jandarbek Bekshın Óńirlik komýnıkasıalar qyzmeti alańynda ótken brıfıńte jastardyń vaksınany elemeı, KVI taralý máselesine enjar qaraıtyndyqtaryn aıtty.
Jýrnalıserdiń suraqtaryna jaýap bere kelip, Jandarbek Bekshın sońǵy epıdemıologıalyq tekserý barysynda naýqastarmen baılanysta bolý saldarynan azamattardyń koronavırýs juqtyrýynyń 86% jaǵdaıynyń tirkelgenin aıtty.
"Olar otbasynda, saýda nysandarynda, kópshilik is-sharalarda, mereıtoı men eske alý keshterinde, qoǵamdyq kólikte indet juqtyrýda", – dedi bas sanıtarlyq dáriger.
J. Bekshınniń aıtýynsha, jańa shtamdardyń taralý qaýpi joǵary. «Sondyqtan Almatydaǵy epıdemıologıalyq jaǵdaı kúrdeli. Qalada koronavırýs aýrýynyń joǵary taralýy jastardyń vaksınaǵa nemquraıly qaraýynan ári karantındik sharalardyń buzylýynan», - dedi bas sanıtarlyq dáriger.
"Negizinen 20 - 40 jastaǵy azamattar dertti tez juqtyrady. Qazir osy jas aralyǵynda dert juqtyrǵandar 38%-dy quraıdy. Búginde indet juqtyrý qaýpi 5% ósimdi kórsetse, bul jastardyń vaksınany elemeýinde. Jastar qart adamdar sıaqty koronavırýstyń jańa shtamymen ınfeksıaǵa jáne aýrýǵa beıim ekenin eskergen jón", – dedi J. Bekshın.
Vırýstyń negizgi tasymaldaýshysy – belsendi jastar. Mysaly, monıtorıńtik toptar demalys kúnderi belgilengen shekteýlerdiń ondaǵan buzýshylyqtaryn tirkedi. Túngi ýaqytta birneshe oıyn-saýyq mekemeleri anyqtaldy. Onda adamdar áleýmettik qashyqtyq pen jumys rejımin saqtamady.
J. Bekshınniń aıtýynsha, 40 pen 60 jas aralyǵyndaǵy halyq belsendi túrde vaksına aldy, bul osy toptyń juqtyrý jaǵdaılarynyń 5%-ǵa tómendegenin kórsetti.
60 jastan asqan adamdar erikti túrde vaksına aldy, sondyqtan aýrýdyń tek 20%-y tirkelgen.
Epıdemıologıalyq talaptardy saqtamaý saldarynan Almatyda 14 jasqa deıingi balalardyń juqtyrý qaýpiniń joǵary ekeni baıqaldy, olardyń arasynda dert 12%-dan 15%-ǵa deıin artty. J.Bekshınniń pikirinshe, bul - SOVID-19 "delta" shtamynyń ereksheligi.