Fransıada jańadan juqtyrǵandar sany kúnine 50 myńnan asady
Álemde koronavırýs juqtyrýdyń jańa jaǵdaılary 3,4 mln asty, dep habarlaıdy Almaty-akshamy.kz COVID-19 taralýyna jol bermeý jónindegi vedomstvoaralyq komısıaǵa silteme jasap.
VAK málimetinshe, koronavırýs juqtyrýdyń jańa jaǵdaılary aldyńǵy uqsas kezeńmen salystyrǵanda 300 myńǵa kóp.
«Aýrý sanynyń ósýi Azıa men Taıaý Shyǵys elderinde baıqalady. Izraılde kúnine shamamen 10 myń vırýs juqtyrý tirkeldi, bul – sáýir aıynyń basynan bergi eń joǵary kórsetkish», - delingen habarlamada.
Sondaı-aq, Eýropanyń birqatar elinde syrqattar sany kúrt ósken.
«Fransıada jańadan juqtyrǵandar sany kúnine 50 myńnan asady, mundaı jaǵdaı sáýir aıynyń aıaǵynan beri bolmaǵan. Germanıada kúnine 80 myńnan astam adamnyń vırýs juqtyrǵany anyqtalǵan, ótken aptamen salystyrǵanda ondaǵy naýqastar sany tórtten birge artty. Al, Italıada keıingi kúnderi birden eki esege ósti», - dep kórsetilgen VAK habarlamasynda.