Elde jumys istegen reseılik qutqarýshylar úılerine qaıtty.
Sırıa Prezıdenti jer silkinisi qurbandaryna gýmanıtarlyq kómek jetkizý úshin Túrkıa shekarasynda jáne eldiń kóterilisshiler baqylaýyndaǵy soltústik-batys aýdandarynda taǵy eki ótkizý pýnktin ashýǵa kelisti. Bul týraly Bashar Asad Damaskidegi kezdesý barysynda BUU Tótenshe jaǵdaılar jónindegi úılestirýshisi Martın Grıffıtske málimdedi, dep habarlaıdy Almaty-akshamy.kz. Azattyq Ruhy-na silteme jasap.
Shekara beketteri úsh aı jumys isteıdi. Al Idlıbke keletin bolsaq, ol Sırıa rejıminiń qarsylastarynyń zastavasy, BUU oǵan tek bir ótkizý pýnkti arqyly kirýge ruqsat aldy, bul kómek jetkizýdi qıyndatady.
Sırıa jer silkinisinen keıin izdeý-qutqarý jumystarynyń aıaqtalǵanyn jarıalady. Onda jumys istegen reseılik qutqarýshylar úılerine qaıtty.
Tiri adamdardy tabý múmkindigi nólge teń bolǵandyqtan, túrik jáne Sırıa bıliginiń basymdyǵy baspanasynan aıyrylǵan júzdegen myń adamǵa kómektesý bolyp otyr.
Túrik Úkimetiniń málimeti boıynsha, stýdenttik jataqhanalarǵa shamamen 1,2 mıllıon adam ornalastyryldy, 206 000-nan astam shatyr ornatyldy jáne qıraǵan aýdandardan 400 000 adam evakýasıalandy. Túrkıa vıse-prezıdenti Fýat Oktaıdyń aıtýynsha, qulaǵan ǵımarattarda 574 bala ata-anasynan aıyrylǵan.
Sońǵy málimetterge sáıkes, Túrkıa men Sırıadaǵy jer silkinisi qurbandarynyń resmı sany 37 myńnan asqan. Sırıanyń Densaýlyq saqtaý mınıstri Hasan Muhammed ál-Habash Sırıa úkimetiniń baqylaýyndaǵy aýmaqtarda qaza tapqandar sany 1 myń 414-ke jetti, al zardap ekkenderdiń sany 2 myń 357 adam dep málimdedi.
Aıta keteıik, Qazaqstan jer silkinisinen zardap shekken Sırıaǵa 50 tonna gýmanıtarlyq kómek jiberýdi zilzala bolǵan alǵashqy kúnderi qolǵa alǵan. Gýmanıtarlyq kómektiń úshinshi ushaǵy dúısenbi kúni keshke Aleppo áýejaıyna jetti. Jetkizilgen qajetti zattardyń ishinde konserviler, jyly kıimder, qysqy shatyrlar, kereýetter men tósek-oryn jabdyqtary bar.