Itterdi qoǵamdyq oryndarda serýendetýdiń óz tártibi bar. Alaıda bul erejelerdiń jıi buzylýy adamdardyń qaýipsizdigine áser etedi, dep habarlaıdy aqshamnews.kz
Pavlodar oblysynda jyl basynan beri janýarlaryn qarǵybaýsyz nemese tumyldyryqsyz serýendetken 400-ge jýyq ıt ıesi jaýapqa tartylǵan.
Qoǵamdyq oryndarda janýarlardy ustaý erejeleri qandaı jáne olardy buzý qandaı saldarǵa ákeledi? Osy suraqtarǵa jaýapty polısıa ókilderi túsindiredi. Úı janýarlaryn serýendetý – árbir ıesiniń jaýapkershiligin talap etetin mańyzdy másele. Pavlodar oblysy polısıa departamenti jergilikti polısıa qyzmeti bastyǵynyń orynbasary Rýfat Kenjınniń aıtýynsha, janýarlardy tek arnaıy belgilengen oryndarda serýendetýge ruqsat etiledi. Alaıda ıeleri kóbinese janýarlaryn balalar alańdarynda, serýendeý alańdarynda nemese adamdar kóp jınalatyn jerlerde serýendetip jatady. Bul jerlerde ıttiń qarǵybaýynan bosap ketý qaýpi bar. Eger ol bireýge fızıkalyq zaqym keltirmese de, psıhologıalyq jaraqat salýy múmkin.
– Mundaı buzýshylyqtar týraly turǵyndar, ótip bara jatqan adamdar nemese arnaıy reıdke shyqqan ınspektorlar habarlaıdy, – deıdi Rýfat Kenjın.
Itterdi tumyldyryqsyz jáne baılaýsyz serýendetý – jıi kezdesetin quqyq buzýshylyqtardyń biri. Erkin júrgen agressıvti ıt aınaladaǵy adamdarǵa qaýip tóndiredi. Jyl basynan beri Pavlodar oblysynda mundaı zańbuzýshylyqtar úshin 400-ge jýyq ıt ıesine ákimshilik jaza qoldanylǵan. Máselen, Pavlodar qalasynyń polısıasyna turǵyndar kóshede tumyldyryqsyz júrgen rotveıler týraly habarlaǵan. Tekserý barysynda onyń ıesine 10 aılyq eseptik kórsetkish mólsherinde aıyppul salynyp, janýardy ustaý erejelerin qatań saqtaý jóninde profılaktıkalyq túsindirme jumystary júrgizilgen.
Eger siz úı janýarynyń ıesi bolsańyz, janýaryńyzdyń kóshede baqylaýsyz júrmeýin qadaǵalap, ony mindetti túrde qarǵybaýmen serýendetýińiz qajet. Sonymen qatar ıtter men mysyqtardy kelesi oryndarda serýendetýge tyıym salynady: turǵyn úılerdiń aýlalarynda,
balalar alańdarynda,
mektepke deıingi mekemelerdiń jáne mektepterdiń aýmaǵynda,
densaýlyq saqtaý mekemeleriniń mańynda,
stadıondarda, saıabaqtar men skverlerde.
Eger janýar oıyn alańdarynda, kógaldarda nemese trotýarlarda nájis qaldyrsa, ony tazalaý – ıesiniń tikeleı mindeti. Bul erejelerdi saqtamaǵan jaǵdaıda, quqyq buzýshy ákimshilik jaýapkershilikke tartylady. Polısıa qyzmetkerleri ıt ıelerin janýarlardy kútip-ustaý erejelerin qatań saqtaýǵa shaqyrady. Árbir ıesi óziniń janýary úshin jaýapty ekenin umytpaǵany jón. Bul – ózge adamdardyń tynyshtyǵy men qaýipsizdigin qamtamasyz etýdiń mańyzdy sharty.