2023 jylǵy 15 qazan saǵat 10:40-ta Jaıyq-Kaspıı oblysaralyq baseındik balyq sharýashylyǵy ınspeksıasynyń Mańǵystaý oblysy boıynsha balyq ınspeksıasy basqarmasy qyzmetkerleri Túpqaraǵan aýdanynda Baýtıno aýylynyń mańynda 25 óli ıtbalyq ushasy men 33 dana bekire tuqymdas balyqtardy tapty, dep habarlaıdy almaty-akshamy.kz Balyq sharýashylyǵy komıtetiniń baspasóz qyzmetine silteme jasap.
Balyq sharýashylyǵy komıtetiniń habarlaýynsha, tabylǵan teńiz janýarlary men balyqtardyń ólekseleri ártúrli dárejede ydyraǵan, bul olardyń ólimi ár ýaqytta bolǵanyn kórsetedi.
"Qoldanystaǵy ózara is-qımyl sqemasyna sáıkes, osy fakt týraly jumys tobynyń barlyq múshesine (jergilikti atqarýshy organdar, mamandandyrylǵan ǵylymı uıymdar, Kaspıı ıtbalyǵyn zertteý jáne ońaltý ortalyǵy, Gıdrobıologıa jáne ekologıa ınstıtýty, Qazaqstandyq qoldanbaly ekologıa agenttigi, Mıkrobıologıa jáne vırýsologıa ǵylymı-óndiristik ortalyǵy, oblystyń veterınarıalyq qyzmeti, ekologıa jáne polısıa departamentteri, tabıǵatty qorǵaý prokýratýrasy) habar berildi. Itbalyq tabylǵan jerdegi jumys tobyn Jaıyq-Kaspıı oblysaralyq balyq sharýashylyǵy baseındik ınspeksıasy basshysynyń orynbasary basqaryp jatyr. Jumys tobynyń qalǵan músheleri sý, aýa, topyraq synamalaryn alý úshin jáne múmkin bolsa, óli janýarlar men balyqtardyń tinderinen synamalar alý úshin barady", - degen Balyq sharýashylyǵy komıteti taratqan habarlamada.
Sırek kezdesetin jáne quryp ketý qaýpi tóngen janýarlar túrleriniń joıylý deregi boıynsha qylmystyq is qozǵaldy.