İİM-de 9 aıdaǵy jumystyń nátıjesi qaraldy
İİM-de alqa otyrysy ótti. Oǵan ortalyq apparat pen aýmaqtyq polısıa bólinisteriniń bastyqtary, vedimistik oqý oryndarynyń basshylary jáne Ulttyq ulannyń óńirlik qolbasshylyqtarynyń komandırleri qatysty, dep habarlaıdy almaty-akshamy.kz
Otyrys barysynda ishki ister organdarynyń aǵymdaǵy jyldyń toǵyz aıyndaǵy jumys qorytyndysy týraly aıtyldy.
Jalpy, qoǵamdyq oryndarda, sonyń ishinde kóshelerde jasalǵan qylmystyq quqyq buzýshylyqtardyń tómendeýi baıqalady. Tonaý, qaraqshylyq pen buzaqylyq azaıǵan. Kúsh qoldaný arqyly jasalǵan qylmystardyń ashylýy jaqsardy.
Jasóspirimder arasyndaǵy qylmysqa qarsy is-qımyl jeke qaraldy. Erjan Sadenov mektepterdegi qaýipsizdikti baqylaýdy kúsheıtýge basa nazar aýdardy. Ol aýmaqtyq polısıa departamentteriniń basshylaryna oqý oryndaryn beınebaqylaý kameralarymen jáne dabyl túımelerimen tolyq qamtýdy, olardy jedel basqarý ortalyqtaryna shyǵarýdy jáne “soqyr jerlerdi” qaldyrmaýdy, kámeletke tolmaǵandar isteri jónindegi ınspektorlardyń jumysyn qaıta qaraýdy jáne jetildirýdi, balalardyń quqyqtaryn qorǵaýǵa jedel ýákilderdi, ýchaskelik ınspektorlardy, patrúlderdi jumyldyrýdy tapsyrdy.
Alqada qaralǵan taǵy bir ózekti másele jol qaýipsizdigin qamtamasyz etý boldy. Bıyl qabyldanǵan sharalar nátıjesinde jol-kólik oqıǵalarynyń sany 4%-ǵa, qaza bolǵandar sany 2%-ǵa tómendedi.
Sonymen birge elektrli samokattar men moped júrgizýshileriniń qaýipsizdigin qamtamasyz etý máselesine erekshe nazar aýdaryldy. Aıta ketý kerek, 1 qyrkúıekten bastap jol júrisi qaǵıdalaryn buzǵany úshin 2079 samokat jáne 4838 moped júrgizýshisi jaýapqa tartyldy.
Vedomstvo jumysynyń negizgi baǵyttarynyń biri – esirtki qylmysyna qarsy kúres. Jyl basynan beri bul salada polıseıler 7 myń profılaktıkalyq is-shara ótkizdi. El aýmaǵynda 2700 esirtki saıty buǵattaldy. Elektrondyq aqparattyq resýrstardy paıdalana otyryp, esirtki zattaryn ótkizýdiń 343 faktisi anyqtaldy.
Erjan Sadenov beınebaqylaý júıesin keńeıtý quqyq buzýshylyqtyń aldyn alý men qylmystardy ashýda negizgi basymdyq bolatynyn atap ótti. Bıyl kameralardyń kómegimen 8 myńǵa jýyq qylmys ashylyp, 400 myńnan astam ákimshilik quqyq buzýshylyqtyń joly kesildi.
Jıyn sońynda elimizdiń bas polıseıi departament bastyqtaryna jeke quram arasynda zańdylyq pen tártiptiń saqtalýyn baqylaýdy kúsheıtýdi, kadr saıasatyn jetildirýdi jáne jergilikti jerlerde profılaktıkalyq jumysty jandandyrýdy tapsyrdy.