İT mamandarǵa arnalǵan biregeı alań – hakaton endi Ortalyq Azıadan shyqqan ónertapqysh qyz-kelinshekterge ashyq.
Qazir jobaǵa qatysýshylardan ótinish qabyldanyp jatyr. 23 mamyrǵa deıin Qazaqstan, Qyrǵyzstan, Ózbekstan, Túrkimenstan men Tájikstan eliniń mamandary aıtýly jobalar alańyna óz ónimderin usyna alady, dep habarlaıdy Almaty-akshamy.kz Qazaqtv.com saıtyna silteme jasap.
"Kásipkerlik, venchýrlyq ınvestısıalar salasynda árbir el jeke-jeke tartymdy bola almaıdy. Basqa da aımaqtardy biriktire otyryp, startaptardyń úlken kólemi paıda bolady. Sonyń arqasynda biz elderimizdi ınvestısıa úshin tartymdy ete alamyz. Onymen qosa Ortalyq Azıa elderiniń barlyǵyn qamtıtyn ekojúıe qurǵymyz keledi. Bizdiń elderde halyq sany az, sondyqtan startaptardyń paıda bolý yqtımaldyǵy da áldeqaıda tómen", - deıdi bıznes-ınkýbatordyń atqarýshy dırektory Anýar Lenzat.
Ótinimderdi jınaý barysynda birneshe joba baıqaý uıymdastyrýshylarynyń kóńilinen shyqty. Onyń ishinde qazaqstandyq ázirleme de bar.
"Búgingi tańda kóptegen aıtı startaptardy jasap jatqan er- azamattar, ıaǵnı bul salada olardyń sany basym. Biz bul trendti sál ózgertkimiz keledi. Qyz-kelinshekter de aýqymdy jobalar oılap taýyp, batys elderi, damyǵan memleketterdegideı ınvestısıa tarta alady dep oılaımyz. Olar komandanyń, startaptyń negizin qalaýshy bolǵany jón. Iaǵnı, munda eń bastysy qyz-kelinshekterdiń ıdeıa generatory bolýynda", - deıdi bıznes-ınkýbatordyń atqarýshy dırektory Anýar Lenzat.
27-29 mamyrda onlaın formatta ótetin baıqaýda názik jandylar áleýmettik jáne ekonomıkalyq máselelerdi sheshetin ónimderdiń prototıptik úlgilerin jasaı alady. Baıqaý qorytyndysy boıynsha, jeńimpazdar aqshalaı syılyqtan bólek, startap akseleratoryna tegin qol jetkize alady.