Islam damý banki Qazaqstannyń sý salasyna $1,15 mlrd kóleminde ınvestısıa salady. Bul kelisim Bakýde ótken BUU-nyń Klımattyń ózgerýi jónindegi (COP29) konferensıasynda bekitildi, dep habarlaıdy aqshamnews.kz
Premer-mınıstrdiń orynbasary jáne ulttyq ekonomıka mınıstri Nurlan Baıbazarov bul Islam damý bankiniń tarıhyndaǵy eń iri qarjylandyrý jobasy ekenin erekshe atap ótti.
Buǵan qosa, Islam damý banki Qazaqstannyń sý sektoryn damytýǵa $3,5 mln kóleminde qaıtarymsyz grant bóldi.
Islam damý banki Qazaqstan Sý resýrstary jáne ırrıgasıa mınıstrligi ázirlegen «Klımat ózgerisine beıimdelgen sý resýrstaryn damytý» jobasyn júzege asyrýǵa atsalysatyn bolady. Taraptar buǵan deıin jobanyń birinshi kezeńi boıynsha kelisimge qol qoıǵan edi.
Jobanyń birinshi kezeńinde Astana sý qoımasyn tolyqtyrýdy qosa alǵanda, tórt jańa sý qoımasyn salý jáne jumys istep turǵan tórt sý qoımasyn qaıta qurý, sondaı-aq 115 kanaldy jóndeý men qaıta jańartý kózdelgen. Bul jumystar Aqmola, Almaty, Jambyl, Qyzylorda, Túrkistan, Batys Qazaqstan, Jetisý oblystarynda jáne Astana qalasynda júrgiziledi.
Sondaı-aq joba aıasynda Islam damý banki men Qazaqstan Sý sharýashylyǵy ǵylymı-zertteý ınstıtýty arasynda sý jáne ózen baseınderiniń máselelerin zertteýge qatysty tehnıkalyq yntymaqtastyq ornatý, sý resýrstarynyń aqparattyq-taldaý ortalyǵyna erte eskertý júıelerin engizý qarastyrylǵan.
Sonymen birge, «Qazsýshar» respýblıkalyq memlekettik kásipornyn tehnıkalyq turǵydan jabdyqtaý jáne sý resýrstaryn basqarý prosesin jetildirý maqsatynda avtomattandyrý ortalyǵyn qurý josparlanýda.
«Memleket basshysy sý salasyna ınvestısıa tartýdyń mańyzdylyǵyn birneshe ret atap ótken bolatyn. Bizge sý ınfraqurylymyn jańǵyrtý jáne klımattyq ózgeristerge beıimdeý mindeti júktelgen. Islam damý banki syndy bedeldi ınstıtýttyń qarjylandyrýy Qazaqstannyń ınvestısıalyq saıasaty men áleýmettik-ekonomıkalyq reformalaryna joǵary senimniń aıǵaǵy», — dedi Nurlan Baıbazarov.