Memlekettik keńesshi Erlan Qarın Telegram-da ishki saıası turǵyda ótip bara jatqan jyl nesimen este qalǵanyn jazdy.
Reformalardy jalǵastyrý
Memleket basshysynyń qańtar aıyndaǵy suhbaty jáne Ulttyq quryltaıdyń úshinshi otyrysy 2024 jylǵa arnalǵan ishki saıasat salasyndaǵy jumystyń kún tártibi men mazmunyn aıqyndap berdi. Jyl boıy qoǵamdyq mańyzy zor birqatar zań ázirlendi jáne qabyldandy. Qoǵamdyq petısıalar ınstıtýty iske qosyldy. Táýelsiz memleketter dostastyǵy men Ortalyq Azıa elderinde alǵash ret atom elektr stansasyn salýǵa qatysty referendým ótti. Referendým ótkizýdi talqylaý eń uzaq saıası naýqan boldy. Aýyl ákimderiniń saılaýy jalǵasyn tapty. Onomastıka, eskertkish jáne geraldıka, memlekettik jáne qoǵamdyq nagrada salalaryn retke keltirý jumysy bastaldy. Áleýmettik-gýmanıtarlyq saladaǵy memlekettik bastamalar dáıekti túrde júzege asyryldy: «Ulttyq qor – balalarǵa» baǵdarlamasy, «Jaıly mektep» ulttyq jobasy, mektepterde tárbıe jumysynyń biryńǵaı baǵdarlamasy, jas ǵalymdarǵa arnalǵan jańa granttar men taǵylymdamalar, jumysshy mamandardyń mártebesi men abyroı-bedelin kóterý.
Jańa syn-qaterlerge jaýap
Memlekettik apparat syn-qaterlerdi jáne synaqtardy abyroımen eńserdi. Prezıdenttiń saıasaty buryn-sońdy bolmaǵan halyqaralyq shıelenis jaǵdaıynda elimizdegi beıbitshilik pen kelisimdi saqtaýǵa, Qazaqstannyń egemendigi men qaýipsizdigin nyǵaıtýǵa yqpal etti. Alapat tasqyn saldary qysqa merzimde joıylyp, memleket barlyq zardap shekken azamattarǵa aýqymdy kómek kórsetti. Áıelder men balalardyń quqyqtaryn qorǵaý, sondaı-aq balalar arasyndaǵy sýısıdke qarsy kúresti úılestirý úshin júıeli sharalar qolǵa alyndy.
Jańa qoǵamdyq etıka
Jańa qundylyqtardyń qalyptasý úderisi jalǵasty. Ádildik, zań men tártip qaǵıdalary memlekettik organdardyń ǵana emes, búkil qoǵamnyń ustanymyna aınaldy. Azamattyq qoǵam Prezıdenttiń bastamasymen qolǵa alynǵan «Taza Qazaqstan» jalpyulttyq naýqanyna, sondaı-aq turmystyq zorlyq-zombylyq, agresıa men vandalızm, nashaqorlyq, oıynqumarlyq jáne ysyrapshyldyq sekildi keselderge qarsy kúreske belsendi aralasty. Ádep jáne minez-qulyq normalaryn saqtaý halyq qyzý talqylaıtyn taqyrypqa aınaldy.
Qoǵamnyń jumyla túsýi
Túrli taqyrypqa baılanysty pikirtalastarǵa qaramastan, jalpy bılik pen qoǵamnyń el bolashaǵyna qatysty túsinigi men kózqarasy ortaq. Qazaqstannyń strategıalyq zertteýler ınstıtýty jyl sońynda ótkizgen saýalnamanyń qorytyndysyna sáıkes, turǵyndardyń 77,7 paıyzy memleketimizdiń damý baǵdary durys dep esepteıdi. Jurttyń qoldaýy 2025 jyly da jalǵasatyn reformalardyń berik tiregi bolmaq.