«İri kólemdi aǵashtar ekpelerdiń ómir súrýin arttyrady» – Almatynyń aýqymdy kógaldandyrý týraly ǵalymnyń pikiri
Almatynyń qoǵamdyq keńistigine eki myńǵa jýyq iri kólemdi aǵash otyrǵyzylýda. Bul týraly Almaty qalasynyń ekologıa jáne qorshaǵan orta basqarmasynan habarlady.
Almatyda «Taza Qazaqstan» respýblıkalyq baǵdarlamasy jáne «Almaty – bizdiń ortaq úıimiz» qalalyq baǵdarlamasy aıasynda iri kólemdi aǵash kóshetterin otyrǵyzý jumystary belsendi júrgizilýde. Bıiktigi keminde 6 metr, jergilikti pıtomnıkterde ósirilgen jáne klımattyq jaǵdaılarǵa beıimdelgen aǵashtar Buqtyrma kóshesi, Rysqulov jáne ál-Farabı dańǵyldarynyń boıyna, sondaı-aq birqatar qalalyq skverlerge otyrǵyzylady.
Jıembaev atyndaǵy QazǴZI ósimdikterdi qorǵaý jáne karantın bóliminiń ǵylymı qyzmetkeri Nurjan Muhamadıevanyń pikirinshe, iri kóshetter ońaı beıimdelip, tamyr alady. «Otyrǵyzylǵan úlken kóshetter – qaraǵaı, qaraǵash, shyrsha bizdiń klımattyq jaǵdaılarymyzǵa beıimdelgen jáne estetıkalyq kórinisti ǵana emes, sonymen qatar bos emes qalalyq keńistikter boıyndaǵy ekologıalyq jaǵdaıdy jaqsartýǵa yqpal etedi», - dedi ol.
Jalpy, aldaǵy aıda qalada Saıyn, Rysqulov, Sátbaev kósheleriniń ýchaskelerinde, Kókjıek sh/a jáne basqa da qoǵamdyq keńistikterde 2 myńǵa jýyq iri kólemdi aǵash otyrǵyzý josparlanǵan. Búgingi tańda 600-den astam kóshet otyrǵyzyldy.
Aǵashtardyń uzaq merzimdi saqtalýyn qamtamasyz etý úshin otyrǵyzý ýchaskelerinde ǵalymdardyń usynystary boıynsha jazda da, kúzgi-qysqy kezeńde de qajetti mıneraldy tyńaıtqyshtardy paıdalana otyryp, kútim qamtamasyz etiledi.