«Qoljetimdi Internet» Ulttyq jobasyna 560 mlrd teńge bólinbek: Smaıylov máseleni óz baqylaýyna alady.
Bıylǵy jyldyń basynan beri Úkimetke baılanys jáne aqparattandyrý máseleleri boıynsha azamattardan 5 myńǵa jýyq ótinish pen shaǵym kelip tústi. Olardyń basym bóligi ınternettiń jyldamdyǵy men sapasyna qatysty. Eldi-mekenderde, tipti iri qalalardyń ózinde mobıldi ınternet joq nemese sapasy nashar. Bul týraly Premer-mınıstr Álıhan Smaıylov Úkimet otyrysynda aıtty, dep habarlaıdy Almaty-akshamy.kz Azattyq Ruhy-na silteme jasap.
Úkimet basshysynyń sózinshe, Memleket basshysynyń tapsyrmasy boıynsha ázirlengen «Qoljetimdi Internet» ulttyq jobasynyń júıeli jumysy nátıje bermeı otyr.
«Mundaı shaǵymdar, ásirese, Almaty men Astanada kóp. Mobıldi ınternetke qyzmet kórsetý baılanys operatorlarynyń mindettemelerine nege kirmeıtini múldem túsiniksiz. Internettiń sapasy men jyldamdyǵyn ólsheıtin quraldar joq. Inspeksıanyń ózi jol boıyndaǵy jáne eldi mekenderdegi ınternet jyldamdyǵyn ólsheı almaıdy. Bul problemalardy sheshý kerek. Qazirgi tańda adamdar birinshi kezekte ınternettiń sapasyna qaraıdy. Jaı ǵana jeli tartyp beretin kezeńnen óttik. Halyqqa sapaly baılanys pen jyldam ınternet qajet», - dedi Álıhan Smaıylov.
Premer-Mınıstr tutynýshylardyń tarıfterdiń aqysyn tolyǵymen tólep otyrǵany alǵa tartyp, olardyń sapaly qyzmetti talap etýi oryndy ekenin aıtty
«Sońǵy 3 jylda baılanys operatorlary bul salaǵa tartylǵan ınvestısıalardy shamamen 60%-ke deıin tómendetip jibergenin atap ótkim keledi. Operatorlarǵa qymbat ınfraqurylymǵa qarjy salǵannan góri, anyqtalǵan zań buzýshylyqtar úshin aıyppul tóleı salǵan tıimdi. Mundaı jaǵdaıdy túbegeıli ózgertý kerek. Usynylyp otyrǵan ulttyq joba dál osy máselelerdi sheshýge baǵyttalǵan. Onyń negizgi maqsaty – halyq pen kásipkerlik sýbektilerin eń kemi sekýndyna 100 Mbıt bolatyn ınternetpen qamtamasyz etý. Talshyqty-optıkalyq baılanys jelilerimen 3 myńǵa jýyq aýyl qamtylýy tıis» - dedi Premer-Mınıstr.
Jospar boıynsha, 2027 jylǵa qaraı respýblıkalyq mańyzy bar qalalardyń 75%-i jáne oblys ortalyqtarynyń 60%-i 5G tehnologıasymen qamtamasyz etilýi kerek. Bul rette, qala ishinde uıaly baılanys jabdyqtaryn ornalastyrý qajettigi týraly halyqqa aqparattyq-túsindirý jumystaryn júrgizý mańyzdy.
«Ol eń aldymen, baılanys sapasyn jaqsartý jáne turǵyndar arasynda radıofobıany azaıtý úshin kerek. Sondaı-aq, derekterdi berý deńgeıi sekýndyna 4-6 terabıtke deıin bolatyn jelilerdiń tranzıttik múmkindikterin ulǵaıtýǵa basymdyq berý qajet. Memleket basshysynyń tapsyrmasy boıynsha Qazaqstan qýatty derekter ortalyqtary men transshekaralyq talshyqty-optıkalyq magıstraldary bar Sıfrlyq habqa aınalýy tıis», -dep naqtylady Smaıylov.
Belgili bolǵandaı, Ulttyq jobanyń osy maqsattaryna búdjetten 5 jyl ishinde shamamen 560 mlrd teńge bólý josparlanýda.
«Jalpy Sıfrlyq damý mınıstrligi men baılanys operatorlarynyń nazaryn myna máselelerge aýdarǵym keledi: Birinshi. Baılanys operatorlary mindettemeleriniń saqtalýyn eskere otyryp, barlyq jerde baılanys sapasy men ınternet jyldamdyǵynyń monıtorıńin kúsheıtý qajet. Halyq pen bıznestiń kóptegen problemalarynyń jedel sheshimi osyǵan baılanysty. Ekinshi. Respýblıka aýmaǵyndaǵy árbir eldi mekenge deıin tartylatyn keń jolaqty ınternet ınfraqurylymynyń ekspozısıasyn aıqyndaý qajet. Onda trafıktiń jyldamdyǵy naqty kórsetilýi tıis. Úshinshi. Qysqa merzimde Ulttyq jobany pysyqtap, Prezıdent Ákimshiligine engizý qajet. Halyqtyń pikirlerin eskere otyryp, barlyq problemalar muqıat pysyqtalýy tıis. Bul máseleni men óz baqylaýymda ustaımyn», - dedi Álıhan Smaıylov.