Nashaqorlyqqa jáne esirtki bıznesine qarsy kúrestiń 2023-2025 jyldarǵa arnalǵan keshendi jospary el aýmaǵynda osy qylmys túrine qarsy is-qımyldy kúsheıtýge qosymsha serpin berdi.
Pavlodar oblysy PD esirtki qylmysyna qarsy is-qımyl basqarmasynyń qyzmetkerleri prokýratýramen kelisilgen jedel-tergeý is-sharalarynyń nátıjesinde esirtkini ınternet-dúken arqyly ótkizýmen aınalysqan qylmystyq toptyń áreketine tosqaýyl qoıdy, dep habarlaıdy Almaty-akshamy.kz Polisia.kz-ke silteme jasap.
Pavlodar jáne Ekibastuz qalalarynyń aýmaǵynda bir ýaqytta arnaıy maqsattaǵy bólimshe jaýyngerleriniń kúshtik qoldaýymen jedel-tergeý toptary osy qylmystyq bızneske qatysýshylardy ustady.
Jedel ýákilder Telegram qosymshasyndaǵy ınternet-dúken arqyly marıhýanany satýdy jolǵa qoıǵan uıymdastyrýshyny jáne taǵy da basqa tórt adamdy quryqtady. Olardyń qatarynda býhgalter, ınternet-dúkenniń ákimshisi, býyp-túıýshi men jasyryp ketýshi bar. Tórt meken jaı boıynsha júrgizilgen tintý nátıjesinde toǵyz keliden astam marıhýana, satylymǵa daıyn esirtki, býyp-túıýge jáne qoldanýǵa arnalǵan túrli qurylǵylar, qylmystyq bızneske qatysy baryn rastaıtyn tehnıka men uıaly telefondar, sondaı-aq ınternet-dúkenniń qarajat aınalymynyń jazbalary tabylyp, tárkilendi.
Kúdiktiler ustalyp, ýaqytsha ustaý ızolátoryna qamaldy.
QR QK-niń 297-baby 3-bóligi “Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý” boıynsha sotqa deıingi is júrgizý bastaldy.
Esterińizge sala keteıik, adamdar tobynyń aldyn ala sóz baılasýymen, birneshe ret, asa iri mólsherde, elektrondyq aqparattyq resýrstardy paıdalaný arqyly jasalǵan bul qylmystar úshin múlki tárkilenip, on jyldan on bes jylǵa deıingi merzimge bas bostandyǵynan aıyrý jazasy qarastyrylady. Tergeý amaldary jalǵasýda. Tıisti saraptamalar taǵaıyndaldy. Uıymdasqan qylmystyq topty qurǵany jáne oǵan qatysqany úshin qylmystyq is qozǵaý josparlanýda.