QR İİM Krımınaldyq polısıa departamenti bastyǵynyń orynbasary Qanat Nurmaǵambetov ınternet-alaıaqtardan qorǵaný joldaryn aıtty, dep habarlaıdy almaty-akshamy.kz QazAqparatqa silteme jasap.
«Internet-alaıaqtyqtan qorǵanýdyń qarapaıym is-sharalaryna toqtalyp, birqatar usynys aıta keteıin. Ózińizdiń jeke málimetterińizdi, plasık kartańyzdyń rekvızıtterin eshkimge aıtpańyz. Aýdarymdar týraly túbirtekti, kodyńyz ben qupıa sózińizdi tipti bank qyzmetkerine de, polısıaǵa da bermeńiz. Belgisiz jáne tekserilmegen saıttarǵa jeke málimetterińizdi senip engizbeńiz. Tekserip almaı, tólem jasamańyz. Tólemdi taýar alǵannan keıin aýdarýǵa kelisýge tyrysyńyz», - dedi ol İİM baspasóz alańynda ótken brıfıńide.
Onyń atap ótýinshe, kúdik týdyratyn mámilelerge aqsha aýdarmaý, tabys kózi belgisiz qarjylyq syzbalardan saq bolý kerek. Qosymshalardy ornatý barysynda App store men Play Market-tiń resmı derekkózderin qoldanǵan jón.
«Bankıng qyzmetterine kirýge arnalǵan qupıa sózdi únemi aýystyryp turý, 3D-qorǵanysty jáne bankter usynatyn ózge de qaýipsizdik is-sharalaryn qoldanyńyzdar. Óz esepshottaryńyzdy, aqsha qozǵalysyn únemi tekserip otyryńyz. Mundaı is-sharalar alaıaqtardan jaltarýǵa jáne aqshańyzdy saqtaýǵa múmkindik beredi», - dedi Qanat Nurmaǵambetov.