Almaty qalasynyń Óńirlik komýnıkasıalar qyzmetiniń brıfıńinde «ITeachMe» qoǵamdyq qorynyń dırektory Zahıra Begalıeva múgedektigi bar adamdar úshin qoljetimdi qalalyq ortany qurý boıynsha negizgi kórsetkishter men josparlardy aıtty, dep habarlaıdy aqshamnews.kz
ÓKQ spıkeri atap ótkendeı, Almaty qalasy ınklúzıvti orta qurý boıynsha Qazaqstanda kóshbasshy orynǵa ıe. 2024 jyly kóptegen mańyzdy jobalar júzege asyryldy jáne 2025 jyl teń múmkindikter qoǵamyn qurý jolynda mańyzdy kezeń bolmaq. Múgedektigi bar adamdar úshin kedergilerdi joıýǵa jáne quqyqtarynyń teńdigin qamtamasyz etýge basa nazar aýdarylady.
Negizgi jetistikterdiń ishinde qala ómiriniń 15 baǵyty men 90 jobany qamtıtyn úzdik álemdik tájirıbelerge negizdelgen «Inklúzıvti Almaty» baǵdarlamasy atap ótildi. Ol bilim berý, densaýlyq saqtaý, mádenıet jáne sportta teń múmkindikter jasaýǵa baǵyttalǵan.
«Halyqaralyq saıasat aıasynda Qazaqstan Múgedekterdiń quqyqtary týraly Konvensıany ratıfıkasıalap, 2023 jyly oǵan Fakúltatıvtik hattamaǵa qol qoıdy. Bul bastamalar memleket deńgeıinde áleýmettik qorǵaýdy kúsheıtýge yqpal etedi», - dep bólisti Z. Begalıeva.
Almatyda qalalyq saıasatqa ınklúzıvti tásilderdi belsendi engizetin ınklúzıa máseleleri jónindegi shtattan tys keńesshiniń róli kúsheıtildi.
2025 jyly 2025-2030 jyldarǵa arnalǵan ınklúzıvti saıasat tujyrymdamasynyń jańa kezeńin iske asyrý bastalady. Negizgi maqsat - múgedektiktiń Medısınalyq jáne qaıyrymdylyq modelinen Áleýmettik jáne adam quqyqtaryn qorǵaýǵa kóshý. Bul árkimniń tolyqqandy ómir súrýine jaǵdaı jasaı otyryp, fızıkalyq, quqyqtyq jáne aqparattyq kedergilerdi joıýǵa múmkindik beredi.
Sonymen qatar, qalalyq baǵdarlamalardy ázirleýde qoldanylatyn Berlınniń tájirıbesine erekshe nazar aýdarylady. Bul yntymaqtastyq alǵashqy jemisin berdi: Almaty óziniń «Inklúzıvti Almaty» baǵdarlamasyn ázirledi.
Qorytyndylaı kele, Z.Begalıeva bul sharalardyń sátti júzege asyrylýy Almatyǵa árbir turǵyn fızıkalyq múmkindikterine qaramastan tolyqqandy jáne belsendi ómir súre alatyn qala bolýǵa múmkindik beretinin atap ótti.