Almatyda jaqsartylǵan fýnksıonaly bar 300 jańa Sergek AÓK ornatý kózdelip otyr
Almaty qalasy Sıfrlandyrý basqarmasy máslıhattyń kezekten tys sesıasynda «Almaty qalasynyń jol trafıgin taldaý jáne zıatkerlik qaýipsizdik júıesi» memlekettik-jekemenshik áriptestik jobasyn keńeıtýdi usyndy.
Joba boıynsha shart aıasynda 1341 aparattyq-baǵdarlamalyq keshen (AÓK (7894 kamera) qyzmet kórsetiledi, onyń 575 AÓK bıyl iske qosylady, dep habarlaıdy Almaty-akshamy.kz.
Polısıa departamentiniń qajettiligine baılanysty jáne Almaty qalasyn damytýdyń 2025 jylǵa deıingi baǵdarlamasyna jáne 2030 jylǵa deıingi orta merzimdi perspektıvalarǵa sáıkes jobany jaqsartylǵan fýnksıonaly bar 300 jańa AÓK-ke (1200 kamera) keńeıtý usynyldy.
«Keńeıtýge keletin bolsaq, «Kórkem Telekom» JSHS jelilik ýchaskelerde shartta bekitilgen AÓK qyzmet kórsetý qunyn ózgertpeı, fýnksıonaly jaqsartylǵan, ınfraqyzyl jarqylmen 300 AÓK ornatady. Osylaısha, kelesi jyldyń sáýirine qaraı 1641 AÓK Sergek (9094 kamera) jumys isteıdi», - dedi Sıfrlandyrý basqarmasynyń basshysy Oljas Jańabek.
2020 jyldan bastap «Sergek» AÓK búgingi kúnge deıin QR JQE 4 mln 996 myń 691 ákimshilik quqyq buzýshylyq tirkeldi. 35 mlrd 614 mln 748 myń teńge aıyppul salyndy, jergilikti búdjetke 27 mlrd 532 mln 297 myń teńge óndirildi. Sonymen birge, QR Bas prokýratýrasynyń Quqyqtyq statısıka jáne arnaıy esepke alý jónindegi komıtettiń deregine sáıkes, 2022 jyldyń qorytyndysy boıynsha 2019 jylmen salystyrǵanda JKO sany 17%-ǵa, joldaǵy ólim-jitim 40%-ǵa, jaralanǵandar sany 30%-ǵa azaıdy.