7 aqpanda Ázirbaıjanda Prezıdent saılaýy ótti. Saılaýda Ilham Álıevtiń jeńiske jetetinine eshkim kúmán keltirmegen. Ortalyq saılaý komısıasynyń aldyn ala esebi boıynsha Álıev 92,1% daýys jınaǵan. Saılaýdyń sońǵy qorytyndysy shyqpaǵannyń ózinde qazirgi prezıdenttiń jeńiske jetetini bárine belgili.
Ilham Álıev qalaı jeńiske jetti? Oǵan Taýly Qarabaqty elge qaıtarý saıasaty áser etti. Sebebi tarıhı ádildikti qalpyna keltirý, halyqtyń sana-sezimin oıatý sıaqty áreketter ǵana qatarynan besinshi ret jeńiske jetýge múmkindik beredi.
Munyń bári syrtqy jaý arqyly jasalsa saılaýda jeńiske jetýge múmkindik artady. Syrtqy jaýy kim? Árıne Armenıa. 1990 jyldary ala almaı ketken eseni qaıtarý maqsatyn qoıdy Ilham Álıev.
Byltyr Ázirbaıjan Taýly Qarabaqty qaıtaryp edi. Osylaısha tarıhı ádildik ornap Ilham Álıevtiń halyq aldyndaǵy bedeli artty. Ol temirdi qyzǵanda bas dep bıyl kezekten tys prezıdent saılaýyn ótkizýdi usynǵan bolatyn. Sebebi 2025 jyly saılaý ótse onyń reıtıńisi túsip ketý qaýpi bolǵan. Olaı jasamasqa amal bolmady. Taýly Qarabaqty qaıtardy, basqa halyqtyń patrıottyq sezimin oıatatyn syrtqy jaý obrazy joq.
Osylaısha aldaǵy 7 jyl I. Álıev el tizginin ustaıdy. Ary qaraı ne bolmaq? Menińshe bul Álıevtiń sońǵy prezıdenttik merzimi bolmaq. 7 jylda bılik tranzıtine daıyndyq úderisi júredi. Sebebi patrıotızmnen bólek, adam jáne azamat quqyǵy, saıası júıeni demokratıalandyrý, áleýmettik-ekonomıkalyq máselelerdi sheshý sıaqty mańyzdy mindetter tur.