İle aýdanynyń ákimi Baǵdat Qarasaevtyń zańsyz áreketteri aımaq ekologıasyna 204 mıllıon teńge kóleminde zıan keltirgen. Bul týraly Antıkorýpsıa agenttiginiń resmı ókili Danıar Bıgaıdarov vedomstvoda ótken brıfıńte málimdedi, dep habarlaıdy aqshamnews.kz.
4 qyrkúıek kúni tańerteń Antıkor áleýmettik jelilerde taraǵan İle aýdany ákimi ustaldy degen aqparatty rastady. Almaty oblysy prokýratýrasy ákimniń zańsyz kásipkerlik qyzmetke qatysqany jáne ókilettigin asyra paıdalanǵany týraly kúdikke ilingenin aıtty.
«Ol senimdi basqarý quqyǵyn ózine jaqyn kompanıaǵa zańsyz túrde berip, qatty turmystyq qaldyqtardy basqarý polıgonyn basqartqany úshin kúdikke ilinip otyr», – dep málimdedi Bıgaıdarov.
Tergeý málimetinshe, ákim polıgondy senimdi basqarý merzimin zańsyz uzartqan. Sheneýnik óziniń qylmystyq sqemasyna aýdannyń qarjy jáne turǵyn-úı komýnaldyq sharýashylyǵy bólimderiniń basshylaryn tartqan.
«Kelisimshart boıynsha qatty turmystyq qaldyqtardy óńdeý mindettemeleri oryndalmaǵan, al kompanıadan túsken tabys onyń jeke baıytýyna baǵyttalǵan», – dep atap ótti agenttiktiń resmı ókili.
Sottyń sanksıasymen kúdikti qamaýǵa alyndy.