Olar fıshıng arqyly messendjerlerge qol jetkizip habarlama taratady.
Qazaqstan Respýblıkasynyń İshki ister mınıstrligi qazaqstandyqtardy alaıaqtardyń taǵy bir qylmystyq sqemasymen tanystyrdy, dep habarlaıdy Almaty-akshamy.kz
«WhatsApp-ta sizge kenetten dosyńyz nemese týysyńyz úlken soma aqsha qaryzǵa surap jazdy ma? Mindetti túrde surańyz - ol ne úshin qajet jáne aqshany qaı shotqa aýdarý kerek. Bálkim, sizge RBK kartasyn nemese shot nómirin jiberedi. Eger siz ózińiz aýdarym jasaýdy usynsańyz, mysaly, Kaspıı arqyly, olar kartanyń qaıta shyǵarylyp jatqanyn aıtady. Alaıaqtar osylaısha ózderiniń qylmystyq sqemasyn qoldanady», -dep jazylǵan habarlamada.
İİM ókilderiniń sózinshe, alaıaqtar fıshıng arqyly messendjerlerge qol jetkizip, osyndaı habarlamalardy taratady.
«Senbeńiz! Jaqyndaryńyzǵa nemese dostaryńyzǵa qaıta qońyraý shalyńyz. Olarǵa parametrlerden baılanysqan qurylǵylardy joıýdy keńes berińiz. Baılanysqan qurylǵylardy joıý úshin WhatsApp nemese Telegram-ǵa kirip, parametrlerden "Baılanysqan qurylǵylar" opsıasyn tańdaý kerek. Eger qurylǵy sizge tanys emes bolsa, «Shyǵý» túımesin basý qajet», - deıdi İİM ókilderi.