İshki ister mınıstrligi azamattarǵa úndeý jasady.
Jappaı jeńildikter, ártúrli merekelerge arnalǵan jalpy satylymdar kezinde azamattar alaıaqtarǵa aldanyp qalýy múmkin. Qarajattan aıyrylyp qalmas úshin İİM qarapaıym erejelerdi saqtaýdy usynady:
- Taýardy tek tekserilgen saıttardan nemese resmı marketpleısterden satyp alyńyz.
- Tym tómen baǵaǵa qyzyqpańyz. Eger jeńildik kúmándi kórinse, bul alaıaqtyq bolýy múmkin.
- Eger áleýmettik jelilerde "qyzyqty" usynysqa tap bolsańyz, dúken nemese satýshy týraly málimetterdi tekserip alyńyz. Bul jaǵdaıda qaldyrylǵan pikirlerge, tirkelýshilerdiń sanyna jáne bólip tóleý múmkindigine nazar aýdarǵan abzal. Alaıda onyń kepil bola bermeıtinin de este ustaǵan jón.
- Satýshyǵa beıneqońyraý shalý arqyly ónimniń bar ekenine kóz jetkizińiz. Dúkenniń mekenjaıy men ornalasqan jerin kórsetýdi talap etińiz. Eger bul alaıaqtar bolsa, olar túrli syltaýlarmen talaptardan bas tartyp, sendirý úshin geolokasıa jiberedi, biraq bul yqtımal alaıaqtyń aılasy.
- Tólem ádisterin tekserińiz. Aqshany jeke shottarǵa jibermeńiz.
- Jeke derekterdi qadaǵalańyz. Eshqashan qupıa sózderdi, SMS-kodtardy jáne karta derekterin bógde adamdarǵa bermeńiz.
- Muqıat bolyńyz! Eger sizde kúmán týyndasa, aqparatty tekserińiz nemese sarapshylarmen keńesińiz, - dedi İİM.