Túzetýler depýtattardyń qaraýyna jiberilgen.
Ortalyq komýnıkasıalar qyzmetinde ótken brıfıńte QR İİM Ákimshilik polısıa komıteti tóraǵasynyń orynbasary Jandos Muratalıev jol qozǵalysy erejelerin buzǵany úshin avtokólik júrgizýshilerin de, jaıaý júrginshilerdi de qatańdatý sharalary týraly aıtty, dep habarlaıdy Almaty-akshamy.kz.
QR İshki ister mınıstrliginiń ókili qatańdatý bóliginde bıyl ǵana Ákimshilik kodekstiń segiz babyna ózgerister engizilgenin aıtty.
«Baptardy qataıttyq. Bul, eń aldymen, jalǵan nómirmen, nómirsiz kólik júrgizýge, sondaı-aq jazataıym oqıǵalarǵa ákeletin jaǵdaılarǵa arnalǵan. Aldaǵy ýaqytta, máselen, júrgizýshi bir jyl ishinde jol erejesin bes retten artyq buzsa, 50 paıyzdyq jeńildikten alyp tastaımyn. Sebebi ol erejeni aı saıyn buzady, al biz oǵan aıyppul salamyz, bul ony tártipke salmaıdy, kerisinshe, jol erejesin buzýdy jalǵastyrady», - dedi Jandos Muratalıev.
Jol qozǵalysy erejesin buzǵan jaıaý júrginshilerge de osyndaı shara qoldaný usynylyp otyr. Onyń aıtýynsha, qazirgi tańda Astana, Almaty sıaqty barlyq qalalarda, oblystarda jaıaý júrginshilerdiń kósheden ótýine barlyq jaǵdaı jasalǵan. Degenmen, 50 metr jerde jer ústi nemese jer asty ótkeli bolsa da, joldy durys emes jerden kesip ótetin jaıaý júrginshiler áli de bar.
«Bul jaǵdaıda 2 AEK kóleminde aıyppul salýymyz múmkin. Júrgizýshilerge qatysty da shara qoldanatyn shyǵarmyz – eger jaıaý júrginshi joldy belgilenbegen jerden birinshi ret kesip ótse, oǵan eskertiledi, ekinshi jaǵdaıda oǵan ákimshilik aıyppul salynady, úshinshi jaǵdaıda aıyppul tóleýge 50% jeńildik bermeıtin sharalar qoldanylady», - dedi Jandos Muratalıev.
Muratalıev qazir tıisti túzetýler QR Parlamenti depýtattarynyń qaraýyna jiberilgenin túsindirdi. Onyń pikirinshe, joldardaǵy tártipti tek ákimshilik sharalar ǵana qalpyna keltire alady.
Sonymen qatar, Komıtet basshysynyń orynbasary qazir Saýda mınıstrligi skýterler úshin ázirlegen standart negizinde «Jol qozǵalysy týraly» zańǵa jáne Jol qozǵalysy erejelerine ózgerister engizilip jatqanyn qosty.
Osydan keıin skýterlerge de ákimshilik shara qoldanylady. Ázirge olar «kólik júrgizýshisi» retinde emes, «basqa jol qozǵalysyna qatysýshylar» retinde ǵana jazalanady.