Bul týraly Bas prokýror Berik Asylov málimdedi.
İİM krımınaldyq polısıa bólimshelerine ınternetti baqylaý, áleýmettik jeliler men messendjerlerdiń qazaqstandyq paıdalanýshylaryn (alaıaqtardy) anyqtaý úshin zamanaýı qural-jabdyqtar men mamandandyrylǵan baǵdarlamalyq júıe satyp aldy, dep habarlaıdy Almaty-akshamy.kz
«Qazirgi ýaqytta jaýapty memlekettik organdar keshendi sharalardy júıeli túrde júzege asyrýda. Atap aıtqanda, İshki ister mınıstrligi krımınaldyq polısıa bólimshelerine ınternetti baqylaý, áleýmettik jeliler men messendjerlerdiń qazaqstandyq paıdalanýshylaryn (alaıaqtardy) anyqtaý úshin zamanaýı qural-jabdyqtar men mamandandyrylǵan baǵdarlamalyq júıeni satyp aldy», – dedi Berik Asylov Májilis depýtattarynyń Mudarabah Capital kompanıasyna qatysty saýaldaryna jaýap bere otyryp.
Ol ótken jyldyń basynan beri Bas prokýratýra qylmystyń bul túrine qarsy naqty sharalar qabyldaǵanyn eske saldy.
«Úılestirý keńesi ótkizildi, vedomstvoaralyq jumys toptary quryldy, is-sharalar josparlary men ádistemelik quraldar ázirlendi, mıkrokredıtter berý qaǵıdalaryna ózgerister engizildi, tıpologıasy men ózara is-qımyl jospary qabyldandy, qarjy pıramıdalarynyń syrtqy belgileriniń tizbesi anyqtaldy. Memleket basshysynyń Joldaýynda aıtylǵan alaıaqtyqqa qarsy is-sharalar qabyldaý týraly tapsyrmasyn oryndaý maqsatynda birlesken sharalar kesheni ázirlendi. Osyǵan baılanysty Jol kartasynyń tarmaqtaryn júzege asyrý úshin Bas prokýratýra janynan vedomstvoaralyq jumys toby quryldy», – dep qosty Bas prokýror.
Sondaı-aq, onyń aıtýynsha İshki ister mınıstrliginiń bilikti mamandaryn daıarlaý maqsatynda, alaıaqtyq jáne qarjy pıramıdalary boıynsha qylmystyq isterdi tergeý taktıkasy men ádisterine baǵyttalǵan arnaıy oqytý baǵdarlamalary ázirlengen.
«Polısıanyń aýmaqtyq bólimshelerinde osy sanattaǵy isterdi ashýǵa jáne tergeýge mamandanǵan turaqty tergeý-jedel toptary quryldy. Qarjy monıtorıńi agenttigi yqtımal qarjylyq pıramıdalardy erte anyqtaý mehanızmin engizdi», – dedi Berik Asylov.