Halyqtan qarýdy satyp alý boıynsha aksıanyń birinshi kúninde polısıaǵa 100-den astam qarý tapsyryldy.
Qoǵamdyq qaýipsizdikti qamtamasyz etý deńgeıin arttyrý maqsatynda İİM 25 sáýirden bastap halyqta zańsyz saqtalýdaǵy atys qarýyn, oq-dáriler men jarylǵysh zattardy satyp alý boıynsha respýblıkalyq aksıa ótkizedi, dep habarlaıdy Almaty-akshamy.kz Polisia.kz-ke silteme jasap.
Qarý-jaraq zattaryn erikti túrde tapsyrǵany úshin respýblıkalyq búdjetten qarýdyń ár birligine onyń tehnıkalyq jaı-kúıine baılanysty somasy 10-nan 100-ge deıingi AEK kóleminde tólem kózdelgen. Aksıanyń alǵashqy kúni polısıaǵa erikti túrde 109 atys qarýy tapsyryldy. Sonyń ishinde 20 sholaq myltyq, 88 tegis uńǵyly, bir travmatıkalyq jáne sholaq myltyqqa arnalǵan 3,5 myń oq-dári tapsyryldy. Barlyq qarý-jaraq túrleri İİM-niń tirkeýi negizinde tekserilip, krımınaldyq saraptamalardan ótkiziledi. Qarý-jaraq zattardy qabyldaý árbir aýmaqtyq polısıa organdarynda júrgiziletin bolady.
«Jaraqattanýdyń aldyn alý maqsatynda tabylǵan jarylǵysh materıaldarmen jáne oq-dárilermen eshqandaı is-qımyl jasamaýdy, eshbir jaǵdaıda olardy tasymaldaýǵa tyryspaýdy, bul týraly kez kelgen polısıa bólimshesine, onyń ishinde 102 nómirine nemese 112 nómirine telefon arqyly habarlaýdy suraımyz. Erikti túrde tirkelmegen atys qarýy, oq-dárilerdi jáne jarylǵysh zattardy tapsyrǵan adamdar qylmystyq jáne ákimshilik jaýapkershilikke tartylýdan bosatylady», – dedi vedomstvoda.
İİM ótkiziletin aksıaǵa turǵyndardyń qoldaý bildiretinine jáne oǵan belsendi qatysatynyna senim bildiredi.
Anyqtama: İshki ister mınıstrligi 2008 jyldan bastap halyqtan zańsyz saqtalǵan qarý-jaraqty satyp alý boıynsha 11 respýblıkalyq aksıa ótkizdi. Bul maqsatqa respýblıkalyq búdjetten qajetti qarjy bólinedi. Barlyq aksıalar barysynda (2008, 2012-2015, 2016-2021) halyq óteýli negizde 54 myńnan astam atys qarýy men oıyq uńǵyly qarýdyń 2 mln. astam patrondaryn óz erkimen tapsyrdy.