İİM Almaty akademıasyna jumys saparymen Gonkongtyń Polısıa koleji men Gonkong polısıa bas basqarmasynyń ókilderi keldi.
Sapardyń basty maqsaty – eki vedimistik joǵary oqý oryndary arasynda áriptestik qarym-qatynas ornatý, tájirıbe almasý jáne birlesken taǵylymdamalardy odan ári uıymdastyrý jáne quqyq qorǵaý organdary qyzmetkerleriniń biliktiligin arttyrý perspektıvasy boldy, dep habarlaıdy aqshamnews.kz Polisia.kz-ke silteme jasap.
Sapar aıasynda kezdesýdiń resmı bóligi ótti, onda eki tarap ózderiniń oqý oryndaryn tanystyryp, erekshelikterine, bilim berý úderisine jáne oqytýǵa degen kózqarastaryna erekshe nazar aýdardy. Máselen, Gonkong Polısıa kolejiniń ókilderi zamanaýı tehnologıalardy qoldanýǵa negizdelgen oqytýdyń biregeı ádistemesi týraly aıtty.
– Gonkong polısıasy – álemdegi eń iri polısıa uıymdarynyń biri. Olardyń vedimistik oqý ornymen yntymaqtastyq ozyq tájirıbelermen almasýǵa, oqý baǵdarlamalaryn jaqsartýǵa jáne quqyq qorǵaý organdary salasynda kadrlar daıarlaý sapasyn arttyrýǵa mańyzdy qadam, – dedi Qazaqstan Respýblıkasy İİM Maqan Esbolatov atyndaǵy Almaty akademıasy bastyǵynyń mindetin ýaqytsha atqarýshy Janat Dilbarhanova.
Sonymen qatar sheteldik joǵary oqý ornynyń ókilderi Gonkongta konstablderdi bastapqy bazalyq daıarlaýdy jáne Gonkong polısıa ınspektorlaryn oqytýdy júrgizetin mektepter men kolejder jumys isteıtinin atap ótti.
– Bizdiń oqý oryndarymyzdyń arasynda kóptegen uqsastyq bar jáne bul yntymaqtastyq jańa birlesken jobalarǵa ákeledi dep úmittenemiz. Sizderdiń elderińizge baryp, Qazaqstanmen berik baılanys ornatý biz úshin úlken mártebe. Bizdiń yntymaqtastyǵymyz eki eldiń quqyq qorǵaý organdaryn damytýǵa óz paıdasyn beredi dep úmittenemiz, – dep atap ótti delegasıa ókili Choi Tung-Tsoi, Louis.
Sapar barysynda qabyldaýshy tarap delegasıa qatysýshylaryn İİM Almaty akademıasynyń bilim berý prosesi men ınfraqurylymynyń biregeı aspektilerimen tanystyrdy. Osylaısha, qonaqtarǵa áskerı jáne taktıkalyq-arnaıy daıarlyq, dene shynyqtyrý daıarlyǵy kafedrasynda sabaqtar, kıberpolıgonnyń múmkindikteri, sondaı-aq Almaty qalasy polısıa departamentiniń kınologıalyq qyzmeti men jedel áreket etý arnaıy jasaǵynyń kórsetilimi kórsetildi. Sonymen qatar delegasıa Naýryzbaı aýdany polısıa basqarmasynyń polısıa servıstik ortalyǵyna bardy.