Qazaqstandyq ziltemirshi, Tokıo Olımpıadasynyń qola júldegeri Igor Son Olympic.kz saıtyna suhbat berip, jarys kezindegi áserimen bólisti, dep habarlaıdy almaty-akshamy.kz
«Oıymdy jınaqtaýǵa týra keldi. Qalaı ýaıymdaǵanymdy sózben jetkize almaımyn. Tokıoǵa deıin osynsha salmaq kótergen emespin. Demek, bul meniń iri jarystarda kórsetken eń jaqsy nátıjem. Jattyǵý zalynda qarsylastardy baqylap otyrdyq. Basty qarsylasym ziltemirdi qısaıtyp alǵan kezde de ýaıymym kete qoımady. Bári bolýy múmkin ǵoı. Men julqa kóterýden jaqsymyn, serpe kóterýde biraz qıyndyq bar. Al tóreshiler eseptemeı qoıǵan eki múmkindikke keler bolsaq, ekeýinde de shyntaǵymnyń qozǵalǵany keri áser etti. Barlyǵy taza bolýy kerek. Rahmet, Qazaqstan! Maǵan qoldaý kórsetkenderdiń bárine alǵys aıtamyn. Alǵa, Qazaqstan!» – dedi Igor Son.