Almatyda volonterlik qozǵalysty damytýǵa jáne qalalyqtardy áleýmettik jobalarǵa tartýǵa baǵyttalǵan aýqymdy bastama - «Igi ister marafony» bastaldy.
Óńirlik komýnıkasıalar qyzmeti alańynda marafonnyń bastalýy týraly Almaty qalasy Jastar saıasaty basqarmasynyń ókilderi áńgimelep berdi, dep habarlaıdy aqshamnews.kz.
Baspasóz konferensıasynda sóz sóılegen basqarma basshysy orynbasarynyń mindetin ýaqytsha atqarýshy Nýrsýltan Bekkaıyrov Almaty árdaıym óziniń belsendi jastarymen jáne qamqor turǵyndarymen tanymal ekenin atap ótti. Qalanyń eriktiler qozǵalysy jyl saıyn áleýmettik kómekten bastap ekologıalyq bastamalarǵa deıingi túrli salalardy qamtyp, óz ustanymyn nyǵaıtyp keledi.
«Búginde Almatyda 30-dan astam iri eriktiler uıymy jumys isteıdi, al eriktilerdiń jalpy sany 50 000 adamnan asady. 2024 jyly eriktiler túrli bastamalardy qoldaýǵa baǵyttalǵan 1200-den astam is-shara ótkizdi», - dedi N.Bekkaıyrov.
«Igi ister marafony» Jastar saıasaty basqarmasynyń qoldaýymen Almaty eriktileriniń front-ofısimen uıymdastyryldy. Bıyl marafon 1 naýryzdan 1 jeltoqsanǵa deıin jalǵasady, al is-sharalar júıelenip, búkil kúntizbelik jylǵa bólinedi.
Marafon aıasynda mańyzdy kúnder men merekelerge arnalǵan 100-den astam is-shara josparlanǵan. Olardyń ishinde «Starostv radost sıaqty is-sharalar-qart adamdarǵa bos ýaqyt pen qamqorlyq uıymdastyrý (pansıonattardaǵy shyǵarmashylyq keshter), «Júrekten júrekke» aksıasy, qan tapsyrý aksıalary, «alǵashqy kómek mektebi», eko-darmarkalar, ashyq aspan astyndaǵy kıno kórsetilimderi jáne t. b.
Alǵys aıtý kúni 13 aksıa («Eńbegińiz úshin myń alǵys», «Birlikke 30 jyl» chellendjderi, «Meıirimdilik kópiri», «Alǵys aǵashy», «Alǵys aıtý qabyrǵasy» jáne t.b.) ótkizildi, oǵan 3000-nan astam adam qatysty.
Sonymen qatar, áleýmettik jeliler men BAQ-ta eriktiler qozǵalysyn nasıhattaýǵa jáne jańa qatysýshylardy tartýǵa baǵyttalǵan keń kólemdi medıakampanıa júrgizilýde.
Almaty eriktileri Front-ofısiniń basshysy Baǵdat Anarbaeva da eriktiler qyzmetiniń mańyzdylyǵy týraly aıtyp berdi.
«Eriktilik - bul jaı ǵana qaıyrymdylyq emes, aınaladaǵy álemdi ózgertý múmkindigi. 2024 jyly Almaty eriktileri 592 tonna gýmanıtarlyq kómek jınady, al 700-den astam jas oqytylyp, qundy daǵdylarǵa ıe boldy», - dep atap ótti Anarbaeva.
Bıyl volonterlik is-sharalar sany arttyrylyp qana qoımaı, bilim berý baǵdarlamalarymen tolyqtyrylatyn bolady. Eriktiler tek kómektesip qana qoımaı, ózderiniń kásibı daǵdylaryn damyta alýy úshin alǵashqy kómek, kóshbasshylyq, is-sharalardy uıymdastyrý jáne jobalyq basqarý boıynsha arnaıy kýrstar men trenıńter iske qosyldy.
Uıymdastyrýshylar Almatynyń barlyq turǵyndaryn, bıznes-qaýymdastyqty jáne qoǵamdyq uıymdardy qatysýǵa shaqyrady. Tirkeýden Almaty eriktileriniń Front-ofısi arqyly ótýge bolady.
«Almaty - belsendi jáne maqsatty adamdardyń qalasy. Birlesken kúsh-jiger arqyly biz muqtaj jandarǵa kómektesip qana qoımaı, qalamyzdy odan ári jaıly, taza ári dostyq qarym-qatynasta etemiz», - dep túıindedi marafondy uıymdastyrýshylar.