Jeksenbige qaraǵan túni qarýly adam Ierýsalımdegi Placha qorǵany qabyrǵasynyń janynda avtobýsqa oq jaýdyrǵan. Izraıl bıliginiń málimetinshe, oqıǵanyń saldarynan kem degende segiz adam jaraqat aldy, dep habarlaıdy Almaty-akshamy.kz Inform.kz-ke silteme jasap.
Shabýyl jergilikti ýaqyt boıynsha 01:24-te dindarlar Placha qorǵanynan qaıtyp kele jatqan kezde bolǵan. Shabýyl jasady degen kúdikti Shyǵys Ierýsalımnen kelgen 27 jastaǵy palestınalyq oqıǵa ornynan qashyp ketken. Biraq sodan keıin baspasózdiń habarlaýynsha, ol bılikke berilgen. Izraıl polısıasy dál sol adamnyń oq atqanyn áli rastaǵan joq.
Quqyq qorǵaý organdary oqıǵany terorıstik shabýyl dep baǵalap otyr. VVS-ge jasaǵan málimdemesinde Izraıl premer-mınıstri Iaır Lapıd shabýylǵa qatysy barlar «beıbit turǵyndarǵa keltirilgen zıan úshin jaýap beretinin» aıtty.
Zardap shekken eki adamnyń jaǵdaıy aýyr, onyń ishinde júkti áıel de bar. Oǵan shuǵyl kesar tiligi jasalǵan, jańa týǵan náreste tiri, jaǵdaıy aýyr, biraq turaqty.
Izraıldik BAQ-tyń habarlaýynsha, jaralanǵan tórt adam – Nú-Iorkten Izraılge barǵan bir otbasynyń músheleri.
Placha qorǵany – qulshylyq etetin ıýdeıler úshin eń qasıetti oryndardyń biri. Jyl saıyn munda myńdaǵan adam qulshylyq etýge keledi.
Oqıǵa Izraıldiń Gaza sektoryndaǵy qarýly operasıadan bir aptadan keıin boldy, onda 47 adam qaza tapqan bolatyn.