Elimizde 4 pozıtrondy-emıssıalyq tomograf jumys istep tur.
Búgin Qazaqstan Respýblıkasy Premer-Mınıstriniń orynbasary Eraly Toǵjanovtyń tóraǵalyǵymen memlekettik, jeke qurylymdar men salanyń jetekshi mamandarynyń qatysýymen ıadrolyq medısınany damytý máseleleri jóninde keńes ótti.
Vıse-premer Qazaqstandaǵy ıadrolyq medısına isteriniń aǵymdaǵy jaı-kúıin, túıtkildi máseleleri men perspektıvalyq baǵyttaryn kóterdi. Densaýlyq saqtaý vıse-mınıstri Ajar Ǵınıat baıandama jasady.
Ol dıagnostıkanyń zamanaýı ádisin júrgizýdi qajet etetin onkologıasy bar pasıentterdiń sany artyp kele jatqanyn atap ótti.
Qazir Qazaqstanda 4 pozıtrondy-emıssıalyq tomograf (PET-ortalyq) jumys jasaıdy: Nur – Sultan qalasynda – 2, Almatyda – 1 jáne Semeıde - 1.
Premer-Mınıstrdiń orynbasary onkologıalyq aýrýlarmen kúres jónindegi keshendi jospardyń «tıimdiligi joǵary erte dıagnostıka» baǵyty aıasynda aldaǵy 2 jylda zertteýdiń ınovasıalyq ádisteri úshin Nur-Sultan, Shymkent, Aqtóbe jáne Qaraǵandy qalalarynda taǵy 4 PET-ortalyq ashý josparlanǵanyn atap ótti.
Keńes qorytyndysy boıynsha Eraly Toǵjanov PET-ortalyqtar jelisin keńeıtý arqyly otandyq ıadrolyq medısınany damytýdyń Jol kartasyn ázirleýdi tapsyrdy.
Sondaı-aq, MJÁ sheńberinde yntymaqtastyqqa múddeli jaýapty memlekettik kompanıalar qatarynan vedomstvoaralyq jumys tobyn qurýdy júktedi.