Bul Ǵylym jáne joǵary bilim mınıstri Saıasat Nurbektiń sózi.
Elimiz boıynsha jataqhanada 17 myń oryn jetispeıdi, dep habarlaıdy Almaty-akshamy.kz
Saıasat Nurbek stýdentterdi jataqhanamen qamtamasyz etý qalaı júrgizilip jatqanyn aıtty.
Premer-Mınıstr Álıhan Smaıylov vedomstvo basshysynan stýdentterdi, onyń ishinde, pedagogıkalyq mamandyqqa oqyp jatqan stýdentterdi jataqhanamen qamtamasyz etý boıynsha qandaı jumystar júrgizilip jatqanyn surady.
"Qazirgi tańda, 17 myń tósek-oryn tapshylyǵy bar. Sońǵy jylda úsh úlken baǵytpen jumys istedik. Birinshisi – sýbsıdıalar arqyly jańa jataqhanalardy qurylysqa engizý. Sýbsıdıalyq normatıvter 2 ese ulǵaıtyldy. Nátıjesinde bıyldyń ózinde 43 jataqhana salynyp jatyr. Onyń 33-i tolyqqandy engizildi. Stýdentterimiz onda turyp jatyr. Qalǵan 10-y osy bir aıdyń ishinde tolyqqandy engiziledi. Qujattardy rásimdeý pysyqtalyp jatyr. Bıyl 10367 tósek-oryndy qamtamasyz etemiz", – dedi mınıstr Úkimet otyrysynda.
Saıasat Nurbektiń dereginshe, 1 qyrkúıekten bastap normatıvtik-quqyqtyq talaptar kúsheıip, zańǵa tıisti ózgerister engizilgen.
"Endi joǵary oqý oryndary osy oqý jylynyń qyrkúıeginen bastap stýdentterdiń keminde 70 paıyzyn jataqhanamen qamtamasyz etýi kerek. Birinshi jyl qabyldanǵanda 100% qamtamasyz etilýi tıis. Sońǵy baǵytqa kelsek, qoldanysta bolǵan bıznes ortalyqtary, hostelder, qonaq úılerdi rekonstrýksıalaý boıynsha normatıvtik sýbsıdıalar da ulǵaıtylyp otyr. Bul da Úkimetten sol obektilerdi jataqhanalarǵa aınaldyrýda úlken kómek bolady", – dedi ol.
Qaýipsizdik standarttaryn kúsheıtý – eń úlken talaptyń biri, dep jalǵastyrdy spıker.
"Mınıstrliktiń arnaıy buıryǵy ázirlendi. 15 naqty talap aıqyndaldy. Tótenshe jaǵdaılar, densaýlyq saqtaý mınıstrlikterimen kelisip, endi kez kelgen jańadan qurylǵan nemese rekonstrýksıadan ótetin hostel, jataqhana, qonaq úı bolsyn, osy talaptarǵa sáıkes bolýy kerek. 17 myń tósek-oryn tapshylyǵy 1-2 jyldyń ishinde tolyqqandy jabylady degen josparymyz bar", – dep tolyqtyrdy Ǵylym jáne joǵary bilim mınıstri.