Hokeıden Qazaqstannyń stýdentter quramasy Amerıkanyń Leık-Plesıde qalasynda Ýnıversıada-2023 týrnıri aıasyndaǵy úshinshi machyn ótkizdi, dep habarlaıdy Almaty-akshamy.kz Sports.kz silteme jasap.
Ǵalym Mámbetalıev shákirtteri Ulybrıtanıa quramasyna qarsy oınady.
Machtyń esebin Batyrlan Muratov ashty, artynsha brıtanıalyqtardan Semúel Rodjers esepti teńestirdi. Sodan keıin Qazaqstan alǵashqy úziliske deıin 5 shaıba soǵyp, alǵa shyqty – Batyrlan Muratov dúbl jasasa, Maksım Mýhametov, Vsevolod Logvın, Ivan Gavrılenko men Artem Korolev mergendik tanytty.
Ekinshi kezeńde otandastarymyz qarsylas qaqpasyna taǵy jeti shaıba engizip, tas-talqanyn shyǵardy. Gol avtorlary – Danıl Býtenko, Álıhan Ómirbekov, Batyrlan Muratov (het-trık), Rýslan Demın, Álı Qasenov, Kırıll Polohov jáne Gavrılenko (dúbl). Úshinshi bólimde Polohov machtaǵy ekinshi shaıbasyn soǵyp, esepti eseledi – 14:1. Mach núktesin Muhametov qoıyp, esepti 15:1-ge jetkizdi.
Eske salaıyq, buǵan deıin qazaqstandyq hokeıshiler Ońtústik Koreıa (5:1) men Vengrıa (9:1) quramalaryn tas-talqan etken bolatyn. Sondaı-aq Qazaqstan óz tobynda Slovakıa jáne AQSH quramalarymen oınaıdy.