Grek-rım kúresinen qazaqstandyq Aıdos Sultanǵalı Zagrebte (Horvatıa) ótken 2025 jylǵy álem chempıonatynda altyn medal jeńip aldy. Fınalda qazaqstandyq sportshy ózbekstandyq balýandy utyp, el qorjynyna ǵasyrdyń alǵashqy "álemdik altynyn" saldy. Elimizge tarıhı jeńis syılaǵan Aıdos Sultanǵalı týraly ne belgili? Aqshamnews.kz materıalynan bilińiz.
Bala armannan bastalǵan chempıondyq jol
Aıdos Sultanǵalı 1996 jyly 7 aqpanda Qyzylorda qalasynda dúnıege kelgen. Sporttyq jolyn erte bastap, jasóspirim shaǵynan-aq erekshe qabiletimen kózge tústi. Ol 2012 jyly kadetter arasyndaǵy Azıa birinshiliginde kúmis júlde jeńip alyp, bir jyldan keıin qurlyq chempıony atandy. 2016 jyly jastar arasynda Azıanyń úzdigi boldy.
Aıdos Sultanǵalı Qyzylorda oblystyq joǵary sport sheberligi mektebinde jattyǵady. Onyń alǵashqy ustazdary – Qazaqstan Respýblıkasynyń eńbek sińirgen jattyqtyrýshysy Vıktor Iýn men jeke bapkeri Ǵabıden Raıymbek.
sýret: kzvesti.kz
Aıdos bozkilemde birtindep shyńdalyp, eresekter arasyndaǵy básekelerde de ózin dáleldedi.
-
2017 jyly Polshadaǵy jastar arasyndaǵy álem chempıonatynda qola júldeger atandy.
-
2018 jyly Býdapeshtte ótken álem chempıonatynda (60 kg) qola aldy.
-
2021 jyly Almatyda Azıa chempıony boldy.
-
2022 jyly Serbıadaǵy álem chempıonatynda taǵy da qola júldege qol jetkizdi.
Al 2025 jyly Zagrebte ótken álem chempıonaty Sultanǵalıdyń sporttyq mansabyndaǵy basty beles boldy. Fınalda ol ózbek balýany Álisher Ǵanıevti utyp, altynnan alqa taqty.
sýret: UOK/Salı Sabırov
"Anamnyń kózinshe eshkimnen jeńilgim kelmeıtin"
Aıdos - otbasynda úsh qyzdyń ishinde jalǵyz ul. Al ata-anasy qarapaıym jandary. Ol januıasynyń qoldaýy jaıly otandyq basylymdardyń birine bergen suhbatynda bólisken edi.
"Áke-sheshem úlken qoldaý bildirip otyrady. Ásirese, anam úlken dem beredi. Bala kezimde anamnyń kózinshe jattyǵatynmyn. Ol kisiniń aldynda uıatqa qalǵym kelmeıdi. Qyzylorda jáne Túrkistan qalalarynda ótken jarysty tamashalaýǵa jaqyndarymnyń kelgeni esimde. Sol kezde qatty tolqydym. Jeńilip qalǵan sátimdi jaqyndarymnyń kórgenin qalamaımyn. Men úshin ol kisiler eń basty – tóreshi", - dedi Aıdos Sultanǵalı.
Onyń endigi aldaǵy basty maqsaty – 2028 jyly Los-Andjeleste ótetin Olımpıadaǵa qatysyp, bıik tuǵyrdan kóriný.
sýret: prosports.kz
"Jeńilisim bir aı boıy túsime kire berdi"
Balýannyń ózine eń qatty qabyldaǵan jeńilisteriniń biri - Fransıadaǵy jastar arasyndaǵy álem chempıonaty. Ol bul chempıonatta túrik balýanǵa ese jibergen edi.
"Barlyq qarsylastarymdy jeńip kele jatyp, túrik balýanynan oısyrata jeńildim. Bul jeńilis maǵan qatty áser etti. Bir aı boıy sol beldesýim túsime kirip júrdi. Keıin ózimdi qolǵa aldym. Sport óte qıyn sala. Degenmen men óte baqyttymyn. Ózimniń súıikti isimmen aınalysýǵa múmkindigim bar" dedi Aıdos Sultanǵalı.
sýret: SDD
Chempıon kimdi úlgi tutady?
Aıdos Sultanǵalı óziniń bala kúninen elikteıtin palýany 1980 jylǵy Máskeý Olımpıadasynyń chempıony Shámil Serikov ekenin aıtady. Sonymen qatar, qazirgi bapkeri ári Atlanta Olımpıadasynyń chempıony Iýrıı Melnıchenkonyń kúresin erekshe baǵalaıdy.
Aıdos ózi tárbıelengen Qyzylorda óńiriniń namysyn qorǵaýdy azamattyq boryshy sanaıdy. Basqa oblystardan usynystar túskenine qaramastan, týǵan jerge adal bolyp qalýdy jón kóredi.
Keleshek býynǵa arnaǵan sózinde ol:
"Úlken týrnırlerdiń aýrasynan qorqýdyń qajeti joq. Qandaı jarys bolsa da, seniń jyldar boıy jınaǵan tájirıbeń bárinen qymbat. Bastysy – daıyndyqqa sený" dedi álem chempıony.
sýret: SDD