Almatyda ótetin "Qaırat" - "Real Madrıd" oıynyna bıletter baǵasy áleýmettik jelilerde qyzý talqyǵa tústi. Kópshilik quny 30 myńnan 250 myń teńgege deıin baratyn bıletterdi qymbatsynyp jatyr. Bul baǵany Eýropadaǵy klýbtardyń bılet baǵasymen salystyrsaq aıyrmashylyq bar ma? Aqshamnews.kz materıalynan bilińiz.
15 qyrkúıekte "Qaırat" fýtbol klýbynyń resmı saıtynda UEFA Chempıondar lıgasynyń oıyndaryna arnalǵan bılettiń baǵasyna qatysty aqparat jarıalandy. Aqparatqa saı, "Qaırat – Real Madrid" oıynynyń bıleti 23 qyrkúıekte satylymǵa shyǵady. Bıletti tek klýbtyń resmı saıtynan jáne Ticketon platformasynan alýǵa bolady: quny 30 000 – 250 000 teńge arasynda.
Osydan keıin áleýmettik jelilerde bılettiń qunyna narazy jurttyń qarasy kóbeıip, túrli post taraı bastady. Sonyń ishinde jýrnalıs Syrym Itqulov Telegram arnasynda "Qaırattyń" machtaryndaǵy bılet qunyn synǵa alyp, Eýropadaǵy keıbir fýtbol klýbtardyń baǵasymen salystyryp kórdi. Onyń aıtýynsha, Mılandaǵy San Siro stadıonynda bılet quny €16 (≈ 8 500 tg), Londondaǵy Tottenham Hotspur Stadium-da £30 (≈ 15 000 tg) bolsa, Madrıdtegi Wanda Metropolitano-da €35 (≈ 16 000 tg) deıdi. Sondaı-aq, Qaırattyń Almatydaǵy 4 machqa arnalǵan paketiniń quny tipti 1 mln-ǵa deıin baratynyn atap ótti.
Factcheck.kz osy tusta Eýropadaǵy klýbtardyń keıbirine sholý jasap, bılet qunyn anyqtap, salystyryp kórdi.
"Qaırat" FK qarsylastarynyń bılet qunyna úńilsek...
28 tamyzda UEFA Chempıondar lıgasy jalpy kezeńindegi 36 komanda arasynda jerebe jasaldy. Jerebede Qaırattyń óz alańyndaǵy jáne syrt alańdaǵy qarsylastary anyqtaldy. Almatyǵa Ispanıalyq Real Madrid, Kıprlyq Pafos, Grekıalyq Olympiakos jáne Belgıalyq Club Brugge keletin bolsa, syrt alańda Anglıalyq Arsenal, Italándyq Inter, Portýgaldyq Sporting jáne Danıalyq Copenhagen-ge qonaqqa barady. Endi ár komandanyń chempıondar lıgasy aıasyndaǵy óz alańynda ótkizetin eń alǵashqy oıynynyń bılet baǵasyn jáne "Qaırat – Real Madrid" arasyndaǵy oıynnyń bılet qunyn eýroǵa aınaldyryp, salystyryp kórdik.
- Kairat: shamamen €46 – €390 eýro arasy;
- Real Madrid: €90 – €590 eýro arasy;
- Olympiakos: €40 – €350 eýro arasy;
- Pafos: €20 – €330 eýro arasy;
- Club Brugge: €175 – €380 arasy;
- Arsenal: £44.80 – £84.00 (≈ €51 – €97) arasy;
- Inter: €21 – €350 eýro arasy;
- Sporting: €20 – €88 arasy;
- Copenhagen: 500 – 1750 dat krony (≈ €67 – €235).
Qaırattyń qarsylastary arasynda eń arzan bılet €20 eýrodan bastalsa, eń qymbaty €590 eýroǵa deıin barady. Teńgege shaqqanda shamamen 13 000 men 378 000 arasynda bolady.
CHL-ǵa alǵash qatysyp otyrǵan klýbtardyń bılet quny qansha?
Bıylǵy maýsymda "Qaırat" fýtbol klýbynan bólek taǵy 3 komanda negizgi kezeńge alǵash ret shyǵyp otyr. Olar: Kıprlyq Pafos, Norvegıalyq Bodø/Glimt jáne Belgıalyq Union Saint-Gilloise. Bul klýbtardyń da bılet qunyn Qaırattyń machyndaǵy bılet baǵasymen salystyryp kórdik.
- Kairat: shamamen €46 – €390 eýro arasy;
- Bodø/Glimt: 300 – 450 norveg krony (≈ €26 – €39) arasy;
- Union Saint-Gilloise: €32 – €112,5 eýro arasy;
- Pafos: €20 – €330 eýro arasy.
Alǵash shyqqan komandalar arasyndaǵy eń arzan bılet €20 bolsa, eń qymbaty €330 eýro. Teńgege shaqqanda shamamen 13 000 men 210 000 arasynda bolady.
Bıletterdiń qunyna qatysty UEFA-da qandaı da bir talap bar ma?
Eýropa fýtbol qaýymdastyǵynyń odaǵynda klýb arasynda bıletterdiń qunyna qatysty naqty bir talap joq. Tek qonaq jankúıerlerge, ıaǵnı qarsylas komandanyń qoldaýshylaryna arnalǵan sektorlarda bılet quny Chempıondar lıgasynda €50 eýro, Eýropa lıgasynda €35 eýro jáne Konferensıa lıgasynda €20 eýrodan aspaý kerek. Sol úshin de óz alańynda mach ótkizetin komanda stadıon syıymdylyǵynyń 5%-yn qarsylas komandanyń jankúıerlerine bólýge tıis. Iaǵnı, UEFA eń bastysy – qonaq jankúıerler úshin bılettiń qoljetimdi bolýyn mindetteıdi.
Factcheck.kz redaksıasy "Qaırat»"fýtbol klýbynyń qarsylastary arasyndaǵy jáne jalpy kezeńge eń alǵash shyqqan komandalardyń bılet baǵasyna sholý jasady. Sholý barysynda eń arzan bıletter 13 myńnan (€20) bastalsa, eń qymbaty ári VIP sektorlarda 378 myńǵa (€590) deıin barady. Al Qaırattyń Almatydaǵy eń alǵashqy oıynynyń bılet quny 30 000 – 250 000 teńge ekenin eskersek, Eýropadaǵy machtardyń baǵasymen salystyrǵanda kóp aıyrmashylyqty baıqalmaıdy. Degenmen ár eldiń ortasha jalaqy mólsheri, jan basyna shaqqandaǵy JİÓ jáne ómir súrý deńgeıiniń ártúrli ekenin aıta ketkenimiz jón.