Baqytgúldiń óz baspanasy da joq
31 qazanda Atyraý oblysy ákiminiń eks-orynbasary Baqytgúl Hamenovanyń isi boıynsha ótken kezekti sot otyrysynda taraptardyń jaryssózi tyńdaldy, dep habarlaıdy Almaty-akshamy.kz «Aq Jaıyq» gazetine silteme jasap.
Memlekettik aıyptaýshy Laýra Asanova sottalýshy Rysqalıevtiń sotta bergen eki túrli aıǵaǵy bir-birine qaıshy bolǵanyn jáne Rysqalıevtiń Antıkor qyzmetkerleri «ınstrýktaj ótkizdi» degen sózine dálel bolmaǵanyn alǵa tartty. Budan basqa, Hamenovaǵa qatysty tergeý materıaldary men aýdıojazbalardaǵy «manaǵyǵa óte saq bol», t.b. sózder paraǵa qatysty ekenin bildiretinin jetkizdi.
Budan keıin Hamenovanyń qorǵaýshysy ári inisi Arman Hamenov sóz aldy.
«Baqytgúl 10 aıdan beri Antıkordyń qıalynan týǵan jalanyń zardabyn tartyp keledi. Biz áke-sheshemizdiń tárbıesin kórip, ákemizdiń «İstegendi moıynda, adal jolmen júr» degen tárbıesimen júrip kelemiz. Eger Baqytgúl para alǵan adam bolsa, osylaı aǵaıyn-týystary bolyp, ony qoldaýǵa keler me edik? Bireýge kúlkili bolar, biraq shynyn aıtqanda, Baqytgúldiń óz baspanasy da joq. Atyraýda qyzmettik páterde turdy, Astanada Parlament úıinde turdy», - dedi inisi.
Budan keıin Hamenova sotqa bolǵan jaıtqa qatysty 40 betten turatyn óziniń ýájin jetkizdi.
«Bul bassyzdyq men úshin jáne meniń týystarym úshin asa qundy abyroıymdy aıaq asty etti, jaqyndarymnyń densaýlyǵyn nasharlatty. Eń soraqysy - naýqas anama jáne balalaryma arnaýǵa tıisti ýaqytymdy urlady. “Hamenovanyń Adamovtan para alý nıeti boldy jáne parany Rysqalıev arqyly talap etti” degen aıyp jalań sóz ǵana», - dedi B.Hamenova.
Taraptardyń jaryssózinen keıin sot tóraǵasy Jumaǵalı Tashımov kelesi otyrysty 14 qarashaǵa qaldyrdy.
Eske salaıyq, buǵan deıin aıyptaýshy tarap sottan Hamenova men Rysqalıevti múlkin tárkilep, 7 jylǵa bas bostandyǵynan aıyrýdy jáne ómir boıyna memlekettik qyzmet atqarý quqyǵynan aıyrýdy, al para berdi dep aıyptalǵan kásipker Ý.Adamovty 4,5 jylǵa bas bostandyǵynan aıyrýdy suraǵan bolatyn.