2024 jyldyń basynan bastap Qazaqstannyń barlyq óńirlerinde memlekettik áleýmettik qorǵaý ınspektorlary 1701 tekserý júrgizdi, onyń 528-i profılaktıkalyq baqylaý sheńberinde, 270-i jospardan tys, 973-i prokýratýranyń talaby boıynsha, dep habarlaıdy almaty-akshamy.kz.
Memlekettik baqylaýmen: ákimdikter – 64, jergilikti atqarýshy organdardyń bólimderi men basqarmalary – 30, memlekettik mekemeler – 17, arnaýly áleýmettik qyzmetter kórsetý ortalyqtary – 38, ońaltý ortalyqtary – 2, aýrýhanalar, emhanalar – 18, stomatologıa – 2, dárihanalar – 11, balabaqshalar – 69, mektepter – 669, kolejder, lıseıler – 3, dúkender – 11, saýda úıleri – 8, bank fılıaldary – 4, «Qazposhta» AQ fılıaldary – 3, polısıa bólimsheleri – 3, DK – 24, mádenıet úıleri –7, muraǵattar, murajaılar – 6, kafeler, meıramhanalar, qonaq úıler – 3, notarıýs – 1, avtobýs parki – 1, kitaphana – 1, BJSM – 1 jáne basqalar qamtyldy.
Máselen, Eńbek jáne áleýmettik qorǵaý komıtetiniń Astana qalasy boıynsha departamenti kreslo-arbamen qozǵalatyn múgedektigi bar adamnyń ótinishi negizinde múgedektigi bar adamdar úshin qoljetimdiliktiń bolmaýy faktisi boıynsha kafe-barǵa jospardan tys tekserý júrgizdi.
Tekserý qorytyndysy boıynsha kásipkerlik sýbektisi aıyppul túrinde ákimshilik jaýapkershilikke tartyldy, sondaı-aq anyqtalǵan buzýshylyqtardy joıý týraly nusqama engizildi.
Sonymen qatar, óńirlerdegi áleýmettik ınspektorlar erekshe qajettilteri bar adamdardyń zańdy quqyqtaryn qamtamasyz etý úshin áleýmettik ınfraqurylym obektileriniń beıimdelý is-sharalaryn júrgizýde oń dınamıkany atap ótti.
Birinshi top múgedektigi bar balanyń anasy Marjan Sultanǵazınanyń aıtýynsha, Óskemen qalasynda múgedektigi bar adamdar úshin jaǵdaıdy jaqsartý máselelerinde oń dınamıka baıqalady.
«Múgedektigi bar adamdar úshin barlyq qajetti jaǵdaılar jasalýda, nysan ıeleri obektilerdi qurylys normalaryna sáıkes keltirý boıynsha jumystar júrgizýde. Kásipkerler men memlekettik mekemeler ǵımarattardy shaǵymdar men usynystardy eskere otyryp jańǵyrtýdan ótkizip jatyr. №1 qalalyq emhanaǵa, «DEVAL» koreı ońaltý ortalyǵyna, «Úlbi» qalalyq aýmaqtyq halyqqa áleýmettik qyzmet kórsetý ortalyǵynda múgedektigi bar adamdar úshin tolyq qoljetimdilik qarastyrylǵan. Jalpy, oblys boıynsha ınfraqurylym nysandarynyń qoljetimdiligi máseleleri sheshilip keledi jáne bul kóńil qýantady», – dedi Marjan Sultanǵazına.
Esterińizge sala keteıik, 2023 jylǵy 1 shildede QR Áleýmettik kodeksi kúshine engen kezden bastap, elimizde memlekettik áleýmettik qorǵaý ınspektorlarynyń ınstıtýty engizildi. Olardyń quzyretine múgedektigi bar adamdardy áleýmettik qorǵaý, arnaýly áleýmettik qyzmetter kórsetý jáne áleýmettik qamsyzdandyrý salasyndaǵy zańnamanyń saqtalýyn baqylaýdy júzege asyrý kiredi.