Dúnıejúzilik densaýlyq saqtaý uıymynyń basshysy Tedros Adhanom Gebreısýs maımyl shesheginiń órshýi álem boıynsha densaýlyq salasyn tótenshe jaǵdaıǵa ákelip soqtyrǵanyn málimdedi, dep habarlaıdy Almaty-akshamy.kz Almaty.tv-ge silteme jasap.
Resmı málimetke sáıkes, álem boıynsha 16 myń adam maımyl sheshegin juqtyrǵany anyqtaldy. Ásirese, Eýropa aımaǵynda indettiń taralý qaýpi joǵary.
Buǵan deıin Reuters senimdi aqparat kózderine silteme jasaı otyryp, Dúnıejúzilik densaýlyq saqtaý uıymynyń sarapshylary maımyl sheshegine qatysty bir sheshimge kelmegenin habarlady. Mamandardyń bir toby álemdik aýqymdaǵy tótenshe jaǵdaı jarıalaýdyń qajeti joq dep shyqty. Alaıda uıym basshysy maımyl shesheginiń halyqaralyq deńgeıde qaýip tóndirip turǵanyna senimdi.
23 shilde kúni Jeneva qalasynda DDSU tótenshe komıtetiniń ekinshi otyrysy ótti. Sonyń qorytyndysy boıynsha ótken baspasóz máslıhatynda Tedros Adhanom Gebreısýs málimdeme jasady.
«Men maımyl shesheginiń jahandyq deńgeıde órshýi qoǵamdyq densaýlyq saqtaý salasyndaǵy halyqaralyq mańyzy bar tótenshe jaǵdaı dep sanaımyn», - dedi Gerbeısýs.
Uıym basshysy komıtet músheleriniń osy másele boıynsha bir kelisimge kelmegenin de ashyq aıtty. 9 sarapshy qarsy bolsa, jeteýi qoldaý bildirdi.
Aıta keteri, DDSU halyqaralyq masshtabtaǵy tótenshe jaǵdaıdy 2020 jyly koronavırýstyń taralýyna baılanysty jarıalaǵan bolatyn.