Almatydaǵy Kardıologıa jáne ishki aýrýlar ǴZI halyqaralyq standarttarǵa sáıkestigin taǵy da rastady jáne JCI-diń (Joint Commission International) qaıta akredıtteý rásiminen sátti ótti. Dálirek aıtsaq, bıylǵy shildede JCI medısınalyq uıymdardy akredıtteý jónindegi halyqaralyq birikken komısıa Almatydaǵy qyzmetine baǵalaý júrgizdi.
Atalǵan ınstıtýt alǵash ret 2021 jyly osyndaı aýdıtten ótken. Alaıda kórsetiletin kómektiń sapasy men qaýipsizdiginiń joǵary standarttaryn saqtaý úshin JCI araǵa úsh jyl salyp ótkizilip turady.
JCI halyqaralyq akredıtteý – bul medısınalyq kómektiń joǵary sapasynyń standarty, medısınalyq qyzmetterdiń sapasy men qaýipsizdigin obektıvti taný. Aýdıtorlar atap ótkendeı, olar ınstıtýtta bolyp jatqan barlyq jaǵdaıǵa pasıenttiń kózqarasymen qarady. Halyqaralyq komısıa músheleri ujymda maqtanýǵa turarlyq nárse kóp ekenin atap ótti, óıtkeni ınstıtýtta joǵary deńgeıdegi mamandar jumys isteıdi. Olar pasıentterge sapaly kómek kórsetý, mýltıdısıplınarlyq tásildi qoldaný, sondaı-aq ózara baılanysty prosester boıynsha komandanyń úılesimdi jumysyn atap ótti.
Aýdıtorlar toby ınstıtýtta qoldanylatyn tıimdilik pen sapanyń jekelegen ındıkatorlaryn, mysaly, qant dıabetimen aýyratyn júkti áıelderdi emdeý tájirıbesin, kardıoreabılıtasıa kezeńderi arasyndaǵy sabaqtastyq krıterıılerin, ishektiń endoskopıaǵa daıyndyq sapasynyń kórsetkishterin jáne t.b. JCI halyqaralyq kitaphanasyna berýge sheshim qabyldady. Mundaı ozyq tájirıbeler búkil álem boıynsha medısınalyq uıymdar arasynda taralyp, tájirıbe almasýǵa jáne medısınalyq qyzmetterdiń sapasyn arttyrýǵa yqpal etedi. Demek, bizdiń otandyq ǴZI-diń zamanaýı tásilderin sheteldik dárigerler de paıdalanady degen sóz bul.
Klınıkanyń jumysy 1110-nan astam kórsetkish boıynsha baǵalanyp, olardyń tek 10-y boıynsha tekserý barysynda joıylǵan eleýsiz eskertýler boldy.
Iá, JCI standarttary boıynsha barlyq bólimshe men prosester baǵalandy, olar: pasıentterdi emdeý jáne kútý tásilderi, olardyń qaýipsizdigi men quqyqtarynyń saqtalýy, ǵımarattyń qaýipsizdigi, dári-dármekpen jumys isteý, ınfeksıalyq qaýipsizdik, kadrlarmen qamtamasyz etý, táýekelderdi basqarý, bilim berý jáne ǵylymı prosester, medısınalyq jáne ákimshilik personaldyń pasıentterge jeke kózqarasy. Qaýiptiligi joǵary dári-dármekpen durys jumys isteý, olardy tańbalaýǵa jáne saqtaýǵa, ınsıdentterdi basqarýǵa, aýrýhanaishilik ınfeksıalardyń, qulaý saldarynan jaraqat alý qaýpin azaıtýǵa erekshe nazar aýdaryldy.
"JCI standarttary densaýlyǵy men ómirin bizge senip tapsyrǵan pasıentterdiń kútimi men qaýipsizdigine baǵyttalǵan. JCI akredıtasıasy pasıentterge klınıkaǵa sene alatynyn kórsetedi. Biz JCI usynatyn quraldardy paıdalana otyryp, qyzmetterdiń sapasyn únemi jaqsartýǵa tyrysamyz", – dedi KİAǴZI Basqarma tóraǵasy Marat Orynbasaruly.