Búgin - Halyqaralyq jer kúni. Aıtýly dataǵa oraı Ulybrıtanıada ekologıalyq máselelerge arnalǵan «Resolution» halyqaralyq mýzykalyq jobasy uıymdastyryldy.
Oǵan bizdiń elimiz de óz úlesin qosty. Ánshi, Qazaqstannyń Eńbek sińirgen qaıratkeri Tamara Asar qorshaǵan ortany qorǵaý týraly ánniń qazaqsha nusqasyn oryndap, beınebaıan túsirdi, dep habarlaıdy Almaty-akshamy.kz 24.kz-ke silteme jasap.
Bul - «Resolution», ıaǵnı «Sheshim» ániniń afrıkalyq nusqasy. Ony Mozambık eliniń ataqty ánshisi Stúart Sýkýma oryndaıdy. Al bul - Birikken Arab ámirligi jas ánshileriniń beınebaıany. Myńdaǵan óner adamynyń basyn biriktirgen jobanyń maqsaty bir – ǵalamsharymyzǵa tónip turǵan klımattyq jáne ekologıalyq qaýipke búkil álem nazaryn aýdartý jáne adamzat balasyn tabıǵatty aıalaýǵa shaqyrý.
Jahandyq bastamaǵa elimiz bıyl birinshi ret qatysty. Qazaqstannyń Birikken Koróldiktegi elshiligi brıtanıalyq Tackroom Theatre kompanıasynyń ótinishi boıynsha «Resolution» ániniń notasyn jáne aǵylshyn tilindegi sózi men qazaq tilindegi jolma jol aýdarmasyn oryndaýshyǵa joldaǵan. Kıiz úı, ulttyq kıim, dombyra men qobyz úni. Jobaǵa elimizdiń atynan halyq jáne estrada ánderin zamanaýı naqyshta oryndaıtyn Qazaqstannyń eńbek sińirgen qaıratkeri Tamara Asar qatysyp, óz nusqasyn usyndy. Qorshaǵan ortany qorǵaýǵa shaqyratyn «Jer-ana» beınebaıanyna balalar da ún qosyp, hormen án saldy.
«Qazaqstandyq nusqa óte keremet! Ol jobamyzǵa erekshe reń berdi dese bolǵandaı. Tamara esimdi ǵajap ánshi ózi ǵana emes, basqa da talantty mýzykanttar men balalardyń basyn biriktirip, ánniń keremet nusqasyn jasaı aldy jáne biz oǵan alǵysymyzdy bildiremiz», - deıdi «Resolution» jobasynyń dırektory Ebbı Raıt.
«Men qýana-qýana qabyl aldym. Sebebi bul ár adamzat balasynyń paryzy, mindeti dep esepteımin. Meniń de, sizdiń de mindetińiz - osy jer sharyna óz úlesimizdi qosyp, ony taza ustaý», - dedi ánshi, Qazaqstannyń Eńbek sińirgen qaıratkeri Tamara Asar.
Jobany Pol Makkartnı, Kıra Naıtlı jáne basqa da tanymal juldyzdar qoldap otyr. Álemniń túkpir-túkpirinde túsirilgen mýzykalyq beınebaıandar jınaǵy iri ekologıalyq uıymdardyń áleýmettik jelilerdegi paraqshalary arqyly taratylady, buqaralyq aqparat quraldarynda jáne BUU-nyń Klımattyń ózgerýi týraly Konferensıasynyń kezekti sesıasynda kórsetiledi.