Qazaqstanda halyqaralyq ǵylymı joba baıqaýlarynda jeńimpaz atanǵan oqýshylarǵa jańa jeńildikter usynyldy, dep habarlaıdy aqshamnews.kz
Endi olar UBT tapsyrmaı-aq grantqa ıe bolyp, aqshalaı syıaqy ala alady. Buǵan deıin bul artyqshylyq tek olımpıada jeńimpazdaryna ǵana beriletin edi. Alaıda, depýtat Asqat Aımaǵambetovtiń usynysymen bul másele sheshimin tapty.
Asqat Aımaǵambetovtiń málimdemesi:
"Biz aqshalaı syıaqy máselesin qaıta-qaıta kóterdik. Nátıjesinde, mine, ol da sheshimin tapty. Halyqaralyq ǵylymı baıqaýlardyń jeńimpazdary men júldegerlerine, sondaı-aq olardy daıyndaǵan pedagogtarǵa birjolǵy aqshalaı syıaqy berý týraly túzetýler qabyldandy. Endi Jalpy otyrysqa shyǵarylady."
Bul ózgeris daryndy balalardy qoldaýdy kúsheıtip, Qazaqstannyń bilim berý jáne ǵylym salasynyń damýyna qosymsha serpin beredi. Endi jas zertteýshiler men ǵalymdar úshin jańa múmkindikter ashylady, ári olardyń eńbegi joǵary baǵalanatyn bolady.