Qalamyzdaǵy Memlekettik qýyrshaq teatry V halyqaralyq «Balausa» eksperımentaldy spektáklder festıvaline qatysady. Bıyl besinshi ret uıymdastyrylyp otyrǵan festıvál aǵymdaǵy jyldyń sáýir aıynyń 20-25 juldyzy aralyǵynda ótedi dep josparlanyp otyr.
Óz tarıhynyń 87-shi jylyna qadam basqan óner ujymy shyǵarmashylyq tynysyn keńeıtýde túrli teatr festıválderine qatysyp, respýblıkalyq, halyqaralyq deńgeıde qýyrshaq óneriniń bedelin arttyryp keledi. Kúlli qazaq teatr ónerine artylar júkti teń kóterip kele jatqan óner ujymy elimizdegi eki jyldyq shekteýlerge qaramastan, birneshe óner festıvaline qatysyp, kásibı deńgeıin arttyrýda júıeli jumys jasap keledi. Bıylǵy jyly da qýyrshaq óneriniń qara shańyraǵy birneshe teatr festıvaline shaqyrtý alyp otyr. Solardyń biri ári biregeıi – Aqtóbe qalasynda T.Ahtanov atyndaǵy drama teatry uıymdastyryp otyrǵan V Halyqaralyq «BALAUSA» eksperımentaldy spektáklder festıvali.
Festıvál aıasynda elimizdegi 40-tan asa teatrlar ótiniminiń arasynan eń úzdik spektáklderdiń basyn qosyp, zamanaýı teatr keńistigindegi jańa tájirıbelerdi saraptaıdy. Atalmysh festıválde sheteldik teatr sarapshylary qazylyq etip, jańashyldyqqa umtylǵan óner ujymynyń talpynystaryn kásibı taldaýdan ótkizedi. Óner dodasyna Memlekettik qýyrshaq teatrynyń repertýaryndaǵy eresekterge arnalǵan «Makbet.Illúzıa» (rejıseri: Dına Jumabaeva) spektakli shaqyrtý alyp otyr. 2021 jyldyń aqpan aıynda jaryq kórgen álem klasıkasy búginge deıin kásibı teatr synshylarynyń joǵary baǵasyna ıe bolyp, «Synshylar júldesi – 2021» nátıjesinde úzdikter qatarynan kóringen bolatyn. Spektáklde adamzatqa ortaq máseleni bir otbasynyń taǵdyrymen sýrettegen aǵylshyn dramatýrgi Ýılám Shekspırdiń keıipkerleri alǵash ret qýyrshaq beınesinde til qatady.
Spektákl rejıseri Dına Jumabaeva pesa jelisindegi shotlandyq koróldiń tarıhı oqıǵasynan buryn januıadaǵy er men áıel tragedıasyn birinshi orynǵa shyǵaryp, shyǵarmaǵa ózindik ınterpretasıa jasaı bilgen. Sahna keńistigin ıgerýdiń jańa formasyn jasaýǵa degen rejıser talpynysy da sátti shyqqan. Kásibı ári kórkem oılardan turatyn spektákl óner báıgesinde laıyqty ornyn taýyp, kásibı baǵasyn alady dep senemiz.