Búgin TMD elderinen kelgen halyqaralyq baqylaýshylar delegasıasy D.Snegın atyndaǵy №30 mektep-gımnazıasynda ornalasqan №383 saılaý ýchaskesine bardy. Baıqaýshylar AES-ti salý máselesi boıynsha daýys berý prosesi Qazaqstan zańnamasyna tolyq sáıkes júrip jatqanyn atap ótip, onyń uıymdastyrylýyna joǵary baǵa berdi, dep habarlaıdy aqshamnews.kz.
Baqylaýshylar arasynda Ázirbaıjan, Belarýs, Qyrǵyzstan, Reseı, Tájikstan, Ózbekstan elderinen akkredıttelgen tulǵalar, sondaı-aq TMD Atqarý komıtetiniń ókilderi bar.
«Baqylaýshylar daýys berýge kelýshilerdiń óte belsendi ári kóńil-kúıleri de kóterińki ekenin baıqady», - dep atap ótti Almaty Qoǵamdyq keńesiniń múshesi Rafael Hasanov.
TMD-dan barlyǵy 74 baqylaýshy Qazaqstannyń toǵyz óńirinde júr. Sonyń ishinde Almaty da bar. Sondaı-aq SHYU, túrki memleketteri uıymdarynyń jáne AÓSSHK ókilderimen yntymaqtasady.