Almaty qalasy qoǵamdyq keńesiniń múshesi, "TIMUS DEVELOPMENT" JSHS dırektory Tımýr Nurtaev sanaq barysynda alynǵan halyq sany týraly derekter bılikke mektepter, balabaqshalar, aýrýhanalar men emhanalardaǵy oryn jetispeýshiligimen kúresýge, sondaı-aq megapolıs pen elde týyndaǵan basqa da máselelerdi sheshýge kómektesetinin aıtty, dep habarlaıdy almaty-akshamy.kz
Tımýr Taımasulynyń pikirinshe, halyq sanaǵy – kez kelgen memleket úshin ómirlik mańyzdy oqıǵa. Olardyń sany týraly málimetter qalaǵa jańa múmkindikter, sonyń ishinde qarjylyq múmkindikter ashýǵa kómektesedi.
«Almaty – qarqyndy ósip, belsendi damyp kele jatqan qala. Bizge turaqty turýǵa jáne jumys isteýge kóptegen adamdar keledi. Biraq turǵyndar neǵurlym kóp bolsa, áleýmettik jáne ınjenerlik ınfraqurylymǵa júkteme soǵurlym joǵary bolady. Megapolıstiń damýyn bolashaqqa josparlaý úshin halyq sany týraly naqty málimetter bolýy qajet», - dep esepteıdi Tımýr Nurtaev.
Ol sanaq qorytyndysy boıynsha, jergilikti atqarýshy organdar búdjet qarajatyn turǵyndardyń ózekti máselelerin sheshýge qaıta bólip, kólik júktemesin durys josparlaı alatynyn aıtty. Budan basqa, nátıjeler áleýmettik baǵdarlamalardy ázirleý kezinde eskeriletin bolady.
«Qurylys kompanıasynyń ıesi retinde halyq sanaǵy azamattardyń áleýmettik mańyzy bar nysandar men ınfraqurylymǵa degen suranysyn anyqtaýǵa kómektesetinin atap ótkim keledi», - dep jalǵastyrdy Tımýr Nurtaev.
Bul sanaqtyń ereksheligi – saıttaǵy sanaq paraqtarynyń suraqtaryna jaýap bere otyryp, ózińiz týraly derekterdi jelide qaldyrý múmkindigi https://sanaq.gov.kz/
Almaty qoǵamdyq keńesiniń múshesi Tımýr Nurtaev sanaq naýqany bastalǵannan keıin birden jańa formatty paıdalanyp, sanaqtan onlaın ótti.
«Qurylysshy retinde maǵan turǵyn úı salynǵan materıaldar týraly másele erekshe este qaldy. Bul memleketke halyqtyń ómir súrý deńgeıine, turmystyq ál-aýqatyna baılanysty turǵyn úı qorynyń sapasy týraly naqty túsinik beredi. Tek osylaı ǵana turǵyn úı saıasatynyń, aýmaqtardy damytýdyń eń tıimdi baǵytyn tańdaýǵa, bizdiń turǵyn úıimizdiń seısmıkter jáne óńirdiń ereksheligine baılanysty basqa da parametrler turǵysynan qanshalyqty qaýipsiz ekenin túsinýge bolady», - dedi Tımýr Nurtaev.
Sarapshy qazirgi ýaqytta turǵylyqty jeri boıynsha páterlerdi aralaý kezeńi bastalǵanyn, sondyqtan qala turǵyndary sanaqshylardan jasyrynbaýyn, derekterdiń qolǵa túspeıtinin aıtty
«Halyq sanaǵy turǵyndardyń tabys deńgeıin, olardyń túrli ıgiliktermen qamtamasyz etilýin, ómirmen qanaǵattanýyn, kútýleri men muqtajdyqtaryn tirkeıdi. Osy aqparatsyz memleket járdemaqy mólsherin, ortasha jalaqyny, eseptik kórsetkishti jáne árqaısymyzdyń ál-aýqatymyzǵa baılanysty basqa da derekterdi sanaly túrde josparlaı almaıdy», - dep tolyqtyrdy sózin Tımýr Nurtaev.
2021 jylǵy sanaqqa qatysýdaǵy óz tájirıbesinen Tımýr Taımasuly ózekti jáne ómirlik mańyzy bar máseleler ekenin atap ótti.
«Keri baılanyssyz halyqtyń naqty suranystaryn memleket tolyq anyqtaı almaıdy. Sondyqtan memleket pen halyq arasyndaǵy baılanys osy halyq sanaǵy arqyly iske asady. Sanaq barysynda áleýmettik jáne ınfraqurylymdyq sharalardy qalaı júzege asyrý kerektigi aıqyndalady. Demek, sanaqqa jappaı qatysý qajet. Mıtıńige baryp, qur daýryqqansha, sanaqtaǵy suraqtarǵa jaýap berip, ómir súrý sapasyn oń ózgertýge yqpal etýge bolady. Óıtkeni, sanaq suraqtary azamattardyń ómir súrý sapasyn jaqsartýǵa baǵyttalǵan. Intervúlerge esik ashqanda, osyny eskergen jón», - dedi Tımýr Nurtaev.