Áskerdiń tynys-tirshiligine qatysty qordalanǵan suraqtar talqylandy.
Qazaqstan Respýblıkasy Parlamenti Májilisiniń depýtaty Aıgúl Quspan Almaty qalasyna jasaǵan jumys saparynda ulandyqtardyń jaǵdaıymen tanysty, dep habarlaıdy Almaty-akshamy.kz
Qalyq qalaýlylary qatarynda Halyqaralyq qatynastar, qorǵanys jáne qaýipsizdik komıtetiniń tóraǵasy Aıgúl Quspan men «AMANAT» partıasy Almaty qalalyq fılıaly tóraǵasynyń orynbasary Aıgerim Mustafaeva bar.
Halyq qalaýlysy aldymen óńirlik qolbasshylyq basqarmasy men 5571 áskerı bóliminde boldy. Májilismendi kútip alǵan «Ońtústik» óńirlik qolbasshylyǵynyń qolbasshysynyń mindetin ýaqytsha atqarýshy polkovnık Bekaıdar Qazkeev qolbasshylyqtyń qyzmettik-jaýyngerlik jumysyn jáne bólimderdiń qazirgi jaǵdaıy men damý perspektıvalaryn, áskerı qyzmetshilerdiń el qorǵaýdaǵy atqaryp jatqan qyzmetteri týraly keńinen tanystyrdy.
Kezdesý barysynda quqyqtyq tártip áskeriniń qyzmettik-jaýyngerlik mindetterdi oryndaý kezinde eleýli áser etetin birqatar máseleler aıtylyp, Ulttyq ulan áskeriniń tynys-tirshiligine qatysty qordalanǵan suraqtar talqylandy.
Keıin halyq qalaýlysy óńirlik qolbasshylyqqa irgeles ornalasqan 5571 áskerı bóliminiń jaýyngerlik ázirligimen jáne olardyń úı-jaılary, turmys-tirshiligimen jaqyn tanysty. Sonymen qatar, bólimniń áskerı tehnıkasyn, atys qarýy men jeke quramnyń arnaıy jabdyqtaryn qarap ótti.
Sapar barysynda Májlis depýtaty qolbasshylyq tarapynan aıtylǵan máseleler basty nazarda bolatynyn, ár kúrmeýli máseleniń sheshimin tabýyna kúsh salatynyn jetkizdi. Sondaı-aq, quqyqtyq tártip áskeriniń jeke quramyna aldaǵy ýaqytta da ásker men memleketti nyǵaıtýǵa laıyqty úles qosatynyna senim bildirdi.
Ulttyq ulannyń «Ońtústik» óńirlik qolbasshylyǵyna qarasty jedel jáne arnaıy maqsattaǵy áskerı bólimderi men bólinisteri ishki ister organdarymen birlesip, elimizdiń 6 qalasynda qoǵamdyq tártipti qamtamasyz etetinin atap ótken jón.
Kún saıyn 1700-den asa quqyqtyq tártip áskeriniń áskerı qyzmetshileri İİO birge patrúldik qyzmet atqarýǵa jumyldyrylady. Aǵymdaǵy jyldyń ózinde Ulttyq ulandyqtar 4000-nan asa quqyq buzýshyny ustap, ishki ister organdaryna jetkizdi. Quqyq buzýshylyqtyń 140-tan astamy qylmystyq sıpatqa ıe. Ulandyqtar kúshimen 17 sýyq jáne atý qarýy, sondaı-aq 0,8 tonna esirtki zattary tárkilengen.