Táýelsiz Qazaq eliniń tarıhynda Ata zańǵa ózgerister men tolyqtyrýlar engizý boıynsha ekinshi ret búkilhalyqtyq referendým 5 maýsymda ótti. Memleket basshysy Q.K. Toqaev ótkizilgen referendým nátıjesine oraı Qazaqstan halqyna úndeý jasady.
Referendýmda halyq óz tańdaýyn jasady. Eńbektegen baladan, eńkeıgen qarıaǵa deıin ózgeristi kútip júrgenin anyq bildirip jatyr. Referendýmnyń alyn ala nátıjeleri boıynsha jalpy daýys berýshilerdiń 77,18% qoldady. Memleket basshysynyń keshegi úndeýinde aldymyzda qandaı aýqymdy jumystar turǵanyn anyq baıqaýǵa bolady. Referendým - bul bastamasy ǵana. Parlament tarapynan ondaǵan Konstıtýsıalyq zańdarǵa ózgerister men tolyqtyrýlar engizý jáne birneshe jańa zańdardy qabyldaý qajettiligi týyndap tur.
AMANAT partıasynyń barlyq deńgeıdegi depýtattary respýblıka boıynsha myńdaǵan kezdesýler ótkizip, referendýmnyń mańyzdylyǵy týraly halyqtyń arasynda túsindirme jumystaryn júrgizdi. Osy joly oıǵa túıgenim depýtattarymyz halyqpen tyǵyz baılanysty kúsheıtken sıaqty. Qarapaıym halyq tarapynan tek qana referendýmǵa baılanysty emes, sonymen qatar tolǵandyrǵan suraqtaryn tikeleı qoıyp oryndalýyn talap etip jatyr.
Jańa Qazaqstannyń sheti kórineıin dep qaldy ma degen oı ketti. Memleket basshymyzdyń bastamasy jaman emes. Elimizdiń bolashaǵy úshin dep eńbek etip júrgen azamattardyń biri ekenine kózimiz jetip otyr. Alla ózi amandyǵyn berip, bolashaq úshin Jańa Qazaqstandy qurýda eńbegimizdi eselene bersin dep tileımin.