Aısholpan Tleýtaı Aıagózdegi 4 balanyń ólimi jaıly jyr jazyp jurtty jylatty.
Budan buryn Qaraǵandydaǵy shahta apatyna baılanysty azaly jyrlar toptamasyn jarıalaǵanbyz.
Aıtysker aqyn bul jyr joldaryn áleýmettik jelide halyqpen bólisti.
Aıagózim, maqtan etem atyńdy
Perzentiń bop toltyryp em sapyńdy.
Keshe biraq sende bolǵan sum jaǵdaı
Janymyzǵa tyrnaqtaryn batyrdy.
Halyq kútken Respýblıka kúninde
Salút emes, gaz balony atyldy.
Taýlaryń da únsiz qaldy aıbyndy
Ózeniń de jylap jatyr aıdyndy.
Azyq izdep, kúnin kórgen ata-ana
Bir-aq sátte tórt baladan aıryldy.
Kim jazady júregińniń jarasyn?!
Kim ketirer qara bulttaı qaıǵyńdy?!
Súıinshi emes, habar kelse qaraly
Qusa muńǵa tolǵan janyń jaraly.
Jaǵdaı jasap, kómek berse úkimet
Ata-anasy qaldyrar ma balany?!
Áleýmettik kómeginen aıyryp
Kimder eken jumys istetken anany?!
Eı, ákimdik, qandaı aýyr ýaqıǵa
Saý basyńa tilep aldyń saqına.
Sábılerden únemdegen qarajat
Tórt balanyń taǵdyryna tatı ma?!
Ata-anany jubatarsyń ne sózben
Balalaryn attandyrǵan baqıǵa?!
Óz halqyńnyń bile almasań qadirin
Bolashaqtyń shapqanyń ǵoı tamyryn.
Kóńil aıtam Áke menen Anaǵa
Synaqtardyń kórip jatqan aýyryn.
Úmit kútken urpaǵymen bir kúni
Jánnat baqta jolyqtyrsyn Táńirim!