Bolat Aıýhanov 85 jasyna qaraǵan shaǵynda ómirden ótti.
Balet ártisi ári horeograf, Qazaq KSR Halyq ártisi, Almaty qalasynyń Qurmetti azamaty Bolat Aıýhanov qaıtys boldy, dep habarlaıdy Almaty-akshamy.kz Baq.kz silteme jasap.
Memlekettik akademıalyq bı teatry málimetinshe, Bolat Aıýhanov 85 jasyna qaraǵan shaǵynda qaıtys boldy. Qoshtasý rásimi Abaı atyndaǵy Qazaq ulttyq opera jáne balet teatrynda ótedi.
Bolat Ǵazızuly Aıýhanov 1938 jyly 13 qyrkúıekte Semeı qalasynda týǵan. Ol A.V. Lýnacharskıı atyndaǵy Máskeý teatr óneri ınstıtýtynyń baletmeısterlik fakúltetin bitirgen. 100-den asa resenzıa, maqala, suhbattyń avtory. Qazaq, orys, túrik, lıtva, aǵylshyn jáne ýkraın tilderin bilgen.
1957 jyldan Abaı atyndaǵy Qazaq memlekettik akademıalyq opera jáne balet teatrynda balet ártisi bolyp jumys istegen. 1964 jyldan bastap Abaı atyndaǵy Qazaq memlekettik akademıalyq opera jáne balet teatrynda baletmeıster bolǵan. 1965 jyldan "Qazaqkonsert" eki akterli teatrynyń balet solısi. 1967 jyldan bastap "Qazaqkonsert" janyndaǵy Almaty Jastar baleti teatrynyń kórkemdik jetekshisi, balet solısi. 1975 jyldan bastap Qazaqstan klasıkalyq bı ansambliniń kórkemdik jetekshisi, balet solısi. 1976 jyldan - Qazaqstan klasıkalyq bı ansambliniń kórkemdik jetekshisi, dırektory bolǵan. Al 1991 jyldan bastap Qazaq memlekettik klasıkalyq bı ansambliniń kórkemdik jetekshisi boldy. 2003 jyldan beri QR Memlekettik akademıalyq bı teatrynyń dırektory qyzmetin atqardy.
"Bolero", "Qazaq sývenıri", "Batyrlar", "Qyz Jibek", "Gamlet", "Karmen-súıta", "Shyńǵysqan" jáne basqa qoıylymdarǵa qatysqan. "Bizdiń jerimizdiń baılyǵy", "Jaýym, toǵyzynshy uldan saqtan", "Túnektiń ámirshisi", "Aıdaı sulý Aısulý ertegisi týraly" kınofılmderine túsken.